İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 96 Hüküm no: 55 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Ustası Hüseyin Ağa ile ortağının İncirli köyündeki fırını kiraladıkları Mahmiye-i İslambol’da Silivrikapısı dâhilinde İbrahim Paşa Çarşısı’nda vâki‘ ekmekçi fırını ustası Hüseyin Ağa b. Yusuf’un kayını ve tarafından vech-i âtî üzere vekîl olduğu Kethudâ Ali Ağa b. Abdurrahman ve Ahmed Ağa b. Hüseyin şehâdetleriyle sâbit olan İbrahim b. Halil nâm kimesne vekâleten ve şerîki Yani v. Nikola nâm zimmî asâleten meclis-i şer‘-i şerîf-i enverde işbu bâ‘iseyi’l-kitâb Mehmed Beyefendi ve hemşîresi Zübeyde Hanım evlâd-ı Vezîr el-merhûm Mollacıkzâde Ali Paşa taraflarından husûs-ı âtîde vekîl-i şer‘îleri olan mûmâ-ileyhâ Zübeyde Hanım’ın zevci müderrisîn-i kirâm-ı zevi’l-ihtirâmdan Mehmed Besim Efendi mahzarında herbiri bi’l-asâle ve bi’l-vekâle ikrâr-ı tâm ve takrîr-i kelâm edip müvekkilân-ı mûmâ-ileyhimâ Mehmed Beyefendi ve Zübeyde Hanım’ın taht-ı tasarruflarında olup Havâss-ı aliyye kazâsına tâbi‘ İncirli nâm karyede vâki‘ beyne’l-ahâlî ve’l-cîrân ma‘lûmü’l-hudûd ve’l-müştemilât bir bâb ekmekçi fırınlarını vekîl-i mûmâ-ileyh Mehmed Besim Efendi târih-i kitâb şehri gurresinden beher şehr beşer buçuk guruş ücret tesmiyesiyle bana îcâr ve teslîm eylediklerinde biz dahi ber-vech-i muharrer bi’l-asâle ve bi’l-vekâle istîcâr ve tesellüm ve kabûl edip ücret-i mezkûre beşer buçuk guruş beher şehr hitâmında müvekkilân-ı mûmâ-ileyhimâ Mehmed Beyefendi ve Zübeyde Hanım’a teslîm ve edâya asâleten ve vekâleten herbirimiz ta‘ahhüd ve iltizâm eyledik [21a] dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurret-i şehri Rebî‘ülevvel sene 1184. Şuhûdu’l-hâl: Kethudâ Ali Ağa b. Abdurrahman, Yiğitbaşı Molla Osman, Salıcı Molla Osman, es-Seyyid el-Hâc Ebûbekir Ağa, el-Hâc Mahmud Ağa, Sofularlı Mustafa, Ahmed Ağa b. Hüseyin, Ali Çelebi b. Abdullah.