İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 97 Hüküm no: 56 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanis v. Sahak’ın Avratpazarı’ndaki fırın ile değirmendeki gedik hissesini sattığı Habbâz tâifesinden olup mahmiye-i İslambol’da Mirâhur mahallesinde mütemekkin Avanis nâm zimmînin babası ve tarafından vech-i âtî üzere vekîl olduğu Usta Markos v. Samuyel ve Kirkor v. Bogos nâm zimmîler şehâdetleriyle sâbit olan Sahak v. Kirkor nâm zimmî meclis-i şer‘-i şerîf-i enverde işbu bâ‘isü’r-rakīm Zakar v. Agop nâm zimmî muvâcehesinde bi’l-vekâle ikrâr ve takrîr-i kelâm edip mahmiye-i mezbûrede Avratpazarı’nda vâki‘ beyne’l-ahâlî ma‘lûmü’l-hudûd bir bâb kebîr ekmekçi fırını ile ona merbût ittisâlinde kâin dört horoslu değirmen ve karşısında vâki‘ dört horoslu uncu değirmeni derûnlarında mevcûde otuz iki re’s bargir ile sâir ber-mûceb-i defter-i müfredât âlât-ı lâzıme ve eşyâ-i ma‘lûme on iki sehim i‘tibârıyla dört sehmi mersûm Zakar zimmînin ve dört sehmi Kirkor nâm zimmînin ve dört sehmi dahi oğlum müvekkilim mersûm Avanis zimmînin şâyi‘an yedlerinde mülk ve hakları olmağla ben zikrolunan fırın ve değirmenlerde gedik ta‘bîr olunan bargirler ile sâir bi’l-cümle âlât-ı lâzıme ve eşyâ-i ma‘lûmeden i‘tibâr-ı mezkûr ile oğlum müvekkilim mersûm Avanis zimmînin mâlik olduğu dört sehim hisse-i şâyi‘asını tarafeynden îcâb ve kabûlü hâvî şurût-ı müfsideden ârî bey‘-ı kat‘î ve safka-i vâhide ile mersûm Zakar zimmîye her re’s bargiri yirmi beşer bin akçe hesâbı üzere cem‘an bin altı yüz altmış altı guruş seksen akçeye bi’l-vekâle bey‘ ve temlîk ve lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm eyledikden sonra semeni olan meblağ-ı mezkûr bin altı yüz altmış altı guruş seksen akçeyi mersûm Zakar zimmî yedinden bi’l-vekâle tamamen ve kâmilen ahz u kabz edip bey‘-ı mezkûrun tağrîr ve gabnine ve istifâ-yı semene ve gedik husûsuna ve târih-i kitâba gelinceye bi-tarîkı’ş-şirke beynimizde cereyân eden ahz u i‘tâ ve mu‘âmelât-ı şettâya ve bi’l-cümle ma‘lûm ve mechûl sâir hukūk-ı şer‘iyeye müte‘allika âmme-i de‘âvî ve kâffe-i mutâlebâtdan ben asâleten ve vekâleten mersûm Zakar zimmînin zimmetini ol dahi kezâlik benimle oğlum mersûm Avanis zimmîden herbirimizin zimmetimizi ibrâ-i âmm-ı kātı‘u’n-nizâ‘la ibrâ ve ıskāt ve herbirimiz âharın ibrâsını bi’l-asâle ve bi’l-vekâle kabûl eyledik ba‘de’l-yevm sâlifü’z-zikr fırın ve değirmenler derûnlarında mevcûde bargirler ile bi’l-cümle sâir âlât-ı lâzıme ve eşyâ-i ma‘lûmenin i‘tibâr-ı [21b] mezkûr ile sekiz sehm-i şâyi‘leri mersûm Zakar zimmînin mülk-i sahîh ve hakk-ı sarîhi olup oğlum müvekkilim mersûm Avanis zimmînin kat‘a alâka ve medhali kalmamışdır dedikde gıbbe’t-tasdîkı’ş-şer‘î mersûm Zakar zimmî şurût-ı nizâmları üzere sayf ve şitâda altı aylık zahîre der-anbar edip hilâf-ı fermân-ı âlî ve mugāyir-i nizâm kat‘a bir türlü vaz‘ u hareket etmemek üzere ta‘ahhüd etmeğin mâ-vaka‘a bi’t-taleb ketb olundu. Fî 16 Rebî‘ülevvel sene 1184. Şuhûdu’l-hâl: Kethudâ Ali, Yiğitbaşı Molla Osman, Salıcı Molla Osman, es-Seyyid el-Hâc Ebûbekir Ağa, Kanlıfırın Ustası Ahmed Ağa, el-Hâc Mahmud Ağa, Sofularlı Molla Mustafa, Üsküdarlı Molla Ali.