İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 98 Hüküm no: 57 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Zakar‘ın Avratpazarı’nda iki değirmende bulunan dört sehim gedik hissesini sattığı Habbâz tâifesinden olup mahmiye-i İslambol’da Avratpazarı’nda Ekmekçi Zakar v. Agop nâm zimmî meclis-i şer‘-i şerîf-i enverde işbu bâ‘isü’r-rakīm köylüsü Abram v. Melcan ve akrabâsı Ohan v. Bedros nâm zimmîler muvâcehelerinde ikrâr-ı tâm ve takrîr-i kelâm edip sâlifü’z-zikr Avratpazarı’nda vâki‘ beyne’l-ahâlî ma‘lûmü’l-hudûd bir bâb kebîr ekmekçi fırını ile ittisâlinde kâin fırın-ı mezkûra merbût dört horoslu değirmen ve karşısında vâki‘ dört horoslu uncu değirmeni derûnlarında mevcûd otuz iki re’s bargirler ile sâir ber-mûceb-i defter-i müfredât âlât-ı lâzıme ve eşyâ-i ma‘lûme on iki sehim i‘tibârıyla sekiz sehmi benim ve dört sehmi Kirkor zimmînin şâyi‘an yedimizde mülk ve hakkımız olmağla ben zikrolunan fırın ve değirmenlerde gedik ta‘bîr olunan bargirler ile sâir bi’l-cümle âlât-ı lâzıme ve eşyâ-i ma‘lûmeden i‘tibâr-ı mezkûr ile mâlik olduğum sekiz sehim hisse-i şâyi‘amın iki sehmini köylüm mersûm Abram zimmîye ve iki sehmini akrabâm mersûm Ohan zimmîye tarafeynden îcâb ve kabûlü hâvî şurût-ı müfsideden ârî bey‘-ı kat‘î ve safka-i vâhide ile bin sekiz yüz otuz üç guruşa bey‘ ve temlîk ve lâyıkı üzere kendilere teslîm eylediğimde onlar dahi ber-vech-i muharrer iştirâ ve temellük ve tesellüm eylediklerinden sonra semeni olan meblağ-ı mezkûr bin sekiz yüz otuz üç guruşu mersûmân Abran ve Ohan zimmîler yedlerinden tamamen ve kâmilen ahz u kabz edip bey‘-ı mezkûrun tağrîr ve gabnine ve istifâ-yı semene ve bi’l-cümle gedik husûsuna müte‘allika âmme-i da‘vâdan herbirimiz âharın zimmetini ibrâ-i âm ile ibrâ ve ıskāt ve herbirimiz âharın ibrâsını kabûl eyledik ba‘de’l-yevm sâlifü’z-zikr fırın ve değirmenler derûnlarında mevcûde bargirler ile sâir âlât-ı lâzıme ve eşyâ-i ma‘lûmenin i‘tibâr-ı mezkûr ile dört sehm-i şâyi‘leri mersûmân Abram ve Ohan zimmîlerin ale’l-iştirâki’s-seviy mülk-i müşterâları ve hakk-ı sırfları olmuşdur dedikde gıbbe’t-tasdîkı’ş-şer‘î mersûmân Abram ve Ohan zimmîler şurût-ı nizâmları üzere sayf ve şitâda altı aylık zahîre der-anbar edip hilâf-ı fermân-ı âlî ve mugāyir-i nizâm kat‘a bir türlü vaz‘ u hareket etmemek üzere ta‘ahhüd etmeğin mâ-vaka‘a bi’t-taleb ketb olundu. Fî 19 Rebî‘ülevvel sene 1184. Şuhûdu’l-hâl: Şâhidûnü’s-sâbıkūn.