İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 99 Hüküm no: 58 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyreklioğlu Agop’un Ahırkapı’daki fırın ile değirmendeki bir sehim gedik hissesini sattığı Habbâz tâifesinden mahmiye-i İslambo[l’da] Ahırkapı’da vâki‘ ekmekçi fırını ustası Zeyreklioğlu Agop v. Melkon nâm zimmî meclis-i şer‘-i şerîf-i enverde işbu bâ‘isü’r-rakīm Kazer v. Ohan nâm zimmî muvâcehesinde ikrâr-ı tâm ve takrîr-i kelâm edip mârrü’z-zikr Ahırkapı’da vâki‘ beyne’l-ahâlî ma‘lûmü’l-hudûd bir bâb ekmekçi fırını ile üç horos, ona merbût Kantarcılar’da Ferhadoğlu Değirmeni demekle ma‘rûf yedi horoslu değirmende mevcûd gedik ta‘bîr olunur yirmi sekiz re’s bargir ile sâir ber-mûceb-i defter-i müfredât âlât-ı lâzıme ve eşyâ-i ma‘lûme dört sehim i‘tibârıyla iki sehmi mersûm Kazer zimmînin ve bir sehmi gāib ani’l-meclis Sarrâf Deli Kazer v. [22a] Samuyel nâm zimmînin ve bir sehmi dahi benim müşâ‘an yedimizde mülk ve hakkımız olmağla ben zikrolunan fırın ve değirmende gedik ta‘bîr olunan bargir ve bi’l-cümle sâir âlât-ı lâzıme ve eşyâ-i ma‘lûmeden i‘tibâr-ı mezkûr ile mâlik olduğum bir sehim hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile mersûm Kazer zimmîye bin altı yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm eyledikden sonra semeni olan meblağ-ı mezbûr bin altı yüz guruşu mersûm Kazer zimmî yedinden tamamen ve kâmilen ahz u kabz edip bey‘-ı mezkûrun tağrîr ve gabnine ve istifâ-i semene ve bi’l-cümle gedik husûsuna müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz âharın ibrâsını kabûl eyledik ba‘de’l-yevm sâlifü’z-zikr fırın ve değirmen derûnlarında -mevcûde bargir ve bi’l-cümle sâir âlât-ı lâzıme-i ma‘lûmenin i‘tibâr-ı mezkûr ile üç sehm-i şâyi‘leri mersûm Kazer zimmînin mülk-i sahîh ve hakk-ı sarîhi olup kat‘a benim alâka ve medhalim kalmamışdır dedikde gıbbe’t-tasdîkı’ş-şer‘î merkūm Kazer zimmî şurût-ı nizâmları üzere sayf ve şitâda altı aylık zahîre der-anbar edip hilâf-ı fermân-ı âlî ve mugāyir-i nizâm kat‘a bir türlü vaz‘ u hareket etmemek üzere ta‘ahhüd etmeğin mâ-vaka‘a bi’t-taleb ketb olundu. Fî 19 Rebî‘ülevvel sene 1184. Şuhûdu’l-hâl: Şâhidûnü’s-sâbıkūn.