İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 100 Hüküm no: 59 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pekmezci Yahya ile ortağının ticarî ortaklıklarına son verdikten sonra birbirlerinin zimmetlerini ibra ettikleri Mahmiye-i İslambol’da Ayazmakapısı hâricinde Zeytuncular sûkunda pekmezci tâifesinden el-Hâc Yahya b. Hüseyin nâm kimesne meclis-i şer‘-i şerîf-i enverde li-ebeveyn e[r] karındaşı ve şerîki işbu bâ‘isü’l-kitâb Hüseyin Beşe nâm kimesne mahzarında ikrâr-ı tâm ve takrîr-i kelâm edip karındaşım mezbûr Hüseyin Beşe ile mukaddemâ pekmez bey‘ ü şirâsında fâide beynimizde münâsafete olmak üzere akd-i şirket ve yedi ay ticâret edip ba‘dehû bu esnâda fesh-i akd-i şirket ve müddet-i mezkûrede eylediğimiz ticâretimizin pazarbaşı vekîli ve sâir ustalar ma‘rifetiyle hesâb-ı sahîh ile hesâbın rü’yet eylediğimizde hâsıl olan fâideden karındaşım mezbûr Hüseyin Beşe’nin hissesine yetmiş iki buçuk guruş isâbet ve altmış beş guruşunu mukaddemâ ahz ve yedi buçuk guruşunu dahi hâlâ kendiye def‘ u teslîm eylediğimde ol dahi yedimden ahz u kabz edip asl-ı mâl ve fâideden herbirimiz âhar zimmetinde bir akçe ve bir habbe alacak hakkımız bâkī kalmamağla husûs-ı şirkete ve fâidesine ve bi’l-cümle târih-i kitâba gelince beynimizde cereyân eden ahz u i‘tâya müte‘allika âmme-i de‘âvî ve kâffe-i mutâlebâtdan karındaşım mezbûr Hüseyin Beşe’nin zimmetini ol dahi benim zimmetimi ibrâ-i âmm-ı kātı‘u’n-nizâ‘la ibrâ ve ıskāt ve herbirimiz âharın ibrâsını kabûl eyledik min-ba‘d ehadühümânın âhar ile husûs-ı mezkûra müte‘allika asla ve kat‘a da‘vâ ve nizâ‘ ve husûmetimiz yokdur dedikde mezbûr Hüseyin Beşe dahi karındaşı mukırr-ı mezbûr el-Hâc Yahya’yı kelimât-ı meşrûhasında vicâhen ve şifâhen tasdîk ve tahkīk etmeğin mâ-vaka‘a bi’t-taleb ketb olundu. Fî 8 Rebî‘ülevvel sene 1184. Şuhûdu’l-hâl: Pazarbaşı vekîli Eyyûbî Ali Usta, Bölükbaşı Ahmed Usta, Osman Usta, Azizoğlu Mehmed.