İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 101 Hüküm no: 60 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nâile Hatun’un Ördek Kasap mahallesindeki menzilini vakfedip İmâm Hüseyin Efendi’yi mütevellî tayin ettiği vakfiye Mâ fîhi mine’l-vakfi ve’t-tescîli ve’t-teslîm câ’e ale’n-nehci’s-sahîhi’l-müstakīm ve ene hakemtü bi-sıhhatihi ve lüzûmihî fî-husûsihî ve umûmihî âlimen bi’l-hilâfi’l-vâki‘ fî-mesâili’l-evkāf beyne’l-eimmeti’l-eşrâf ve’l-ulemâ’i’l-eslâf Nemakahü’l-fakīru ila’llâhi’l-meliki’l-hallâk Mollacıkzâde İshak el-kādî bi-Dârü’s-Saltanati’l-aliyye -Gufira lehümâ- Elhamdü li’llâhi’l-vâkıf ale’z-zamâir ve’l-esrâr ve’s-salâtü ve’s-selâmü alâ-nebiyyihi’l-muhtâr ve alâ-âlihi’l-ahyâr ve ashâbihi’l-ebrâr ammâ ba‘d işbu kitâb-ı sıhhat-nisâbın tahrîrine bâ‘is ve bâdî oldur ki mahmiye-i İslambol’da Ördek Kasab mahallesi sâkinelerinden olup zâtı ta‘rîf-i şer‘î ile mu‘arrefe olan sahibetü’l-hayrât ve râgıbetü’s-sadakāt Nâile Hatun bt. Abdullah b. Abdurrahman meclis-i şer‘-i şerîf-i enver ve mahfil-i dîn-i münîf-i ezherde vakf-ı âti’z-zikre li-ecli’t-tescîl ve’l-emri’l-itmâm ve’t-tekmîl mütevellî nasb ü ta‘yîn olunan İmâm-ı mahalle Hüseyin Efendi b. Abdurrahman mahzarında ikrâr-ı sahîh-i şer‘î ve i‘tirâf-ı sarîh-i mer‘î edip bâ-hüccet-i şer‘iye yedimde mülküm olup mahalle-i mezbûrede vâki‘ bir tarafdan sâbıkā Sekbânbaşı Tokâdî İbrahim Ağa menzili ve bir tarafdan ba‘zen Çavuş zevcesi Emine Hatun evlâdı menzili ve ba‘zen Sûzenîci Ali Çelebi menzili ve iki tarafdan tarîk-i âm ile mahdûd tûlen kırk üç ve arzan yirmi sekiz ve be-hesâb-ı terbî‘î bin iki yüz zirâ‘ arsa üzerinde mebnî dâhiliye ve hâriciyeli fevkānî ve tahtânî büyût-ı adîde ve müştemilât-ı sâire-i ma‘lûme ve bi’r-i mâ ve havluyu muhtevî bir bâb mülk menzilim hasbeten li’llâhi’l-ferdi’s-samed ve taleben li-merzati’r-rabbi’l-ehad vakf-ı sahîh-i muhalled ve habs-i sarîh-i müeebbed ile vakf ve habs edip şöyle şart ve ta‘yîn eyledim ki menzil-i mezkûrda hayatda oldukça dilersem kendim sâkine ve mutasarrıfe olam ve dilersem ecr-i misli olan yevmî bir akçe icâre-i müeccele ve mu‘accele-i misliye ile alâ-mâ-ceretü’l-âde âhara îcâr edip icâre-i müeccele ve mu‘accelesine mutasarrıfe olam bi-emrillâhi te‘âlâ vefât eylediğimde sâlifü’l-beyân Ördek Kasab Câmi‘-i şerîfi vakfına zamm ü ilhâk olunup hâsıl olan müeccele ve mu‘accelesi câmi‘-i mezkûrun mefrûşâtına ve iktizâ eden ta‘mîrâtına ve Ramazan-ı şerîf ve sâir leyâlî-i mübârekede revgan-ı şem‘ ve îkād-ı kanâdîl ve levâzım-ı sâiresine harc u sarf oluna ve vakf-ı mezkûruma hayatda oldukça kendim mütevelliye olup nefsime meşrûta ola vefâtımdan sonra mârrü’z-zikr Ördek Kasab Câmi‘-i şerîfinde imâm olanlar vakf-ı mezkûruma mütevellî olup hâsıl olan gallesi vech-i meşrûh üzere câmi‘-i merkūmun levâzımına harc u sarf eyleye ahâlî-i mahalle-i mezbûre hasbî nâzırlar olalar ve eğer mürûr-ı eyyâm ve şuhûr ile şurût-ı mezkûreye ri‘âyet müte‘assire olursa vakf-ı mezbûr mutlaka vakf-ı fukarâ-i ehl-i îmân ola deyü ta‘yîn-i şurût ve tebyîn-i kuyûd edip menzil-i mahdûd-ı mezkûru fâriğan ani’ş-şevâgil mütevellî-i merkūma [23a] teslîm ol dahi tesellüm ve kabz ve sâir mütevellîler evkāfda tasarrufları gibi mutasarrıf oldu dedikde gıbbe’t-tasdîk fî-cemî‘i mâ-zukire vâkıfe-i merkūme Nâile Hatun inân-ı kelâmını semt-i rücû‘a atf ve istirdâda sarf edip vakf-ı akār muktedâ-yı eimme-i ahyâr olan İmâm-ı a‘zam ve hümâm-ı efhâm Ebû Hanife el-Kûfî hazretleri katında sahîh lâkin gayr-ı lâzım olup rücû‘u meşrû‘ ve husûsan âlim-i rabbânî İmâm Muhammed b. el-Hasan el-Şeybânî hazretleri katında menâfi‘-i vakf nefs-i vâkıfa şart olundukda hilye-i sıhhatden âtıl olmağın vakf-ı mezbûrdan rücû‘ ve menzil-i mezkûru kemâ-kân mülküme istirdâd ve istircâ‘ ederim deyicek mütevellî-i merkūm cevâb-ı şer‘î-i meşhûra âğâze edip eğerçi vakf-ı akār inde’l-imâmi’l-a‘zam ve’l-hümâmü’l-efhâm sahîh ve gayr-ı lâzım olup lâkin fâzıl-ı samedânî İmâm Ebî Yusuf eş-şehîr bi’l-imâmi’s-sânî hazretleri katında vakıf mücerred vakaftü demekle ve imâm-ı müşârün-ileyh İmâm Muhammed hazretleri katında mütevelliye teslîm olunmağla tahattüm ve lüzûmla mersûm olup rücû‘u gayr-ı meşrû‘dur deyü redd ü teslîmden imtinâ‘ ve hâkim-i muvakkı‘-ı sadr-ı kitâb tûbâ lehû ve hüsnü-meâb efendi hazretleri huzûrunda müterâfi‘ât ve fasl ü hasme tâlibân olduklarında hâkim-i mûmâ-ileyh -en‘ama’llâhu ni‘ame rızâ’ihî aleyh- dahi tarafeynin kelâmlarına nazar ve mennâ‘un li’l-hayr olmakdan hazer edip cânib-i ecr ve sevâbı ahrâ ve mülke redden vakfa hüküm ve kazâyı evfak ve evlâ ve akreb li’t-takvâ görmeğin âlimen bi’l-hilâf ve râgıben bi-mâ-yecibü ri‘âyetehû fi’l-hükm bi’l-evkāf imâmeyn-i mûmâ-ileyhimâ re’y-i münîrleri üzere vakf-ı mezbûrun sıhhat ve lüzûmuna hükm-i sahîh-i şer‘î ve kazâ-i sarîh-i mer‘î etmeğin min-ba‘d vakf-ı mezbûr sahîh ve lâzım olup naks ve nakīzına mecâl muhâl oldu “fe-men beddelehû ba‘demâ semi‘ahû fe-innemâ ismühû ale’l-lezîne yübeddilûnehû innallâhe semî‘un alîm” cerâ zâlik ve hurrire. Fî-gurreti şehri Rebî‘i’l-evvel li-sene erba‘a ve semânîn ve mie ve elf. Şuhûdu’l-hâl: Himmetzâde es-Seyyid Mehmed Mecdüddin, Tûtizâde es-Seyyid Ahmed Çavuş, Hattât es-Seyyid Osman Efendi b. Mahmud, Kādızâde Hüseyin Efendi b. Mehmed Ağa, Mu‘allim-i sıbyân es-Seyyid Mehmed Efendi, Kādızâde es-Seyyid Mehmed Emin Efendi, es-Seyyid Mustafa Çavuş, es-Seyyid Hüseyin Odabaşı b. es-Seyyid Ömer, es-Seyyid Ali Çelebi yorganî, İbrahim Hâkî kâtib-i İbrahim Efendi, İmâmzâde Hâfız İbrahim, Mustafa Ağa el-meşhûr Tozlu Bey, Hâfız İbrahim Efendi, Mısırlı Damadı Mustafa Ağa, Mehmed Emin Ağa yorganî, Hasan Efendi b. Mehmed Efendi, Mahmud Odabaşı b. Yunus, Salih Ağazâde Mehmed Salih be-nâm-ı Paşa.