İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 103 Hüküm no: 61 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lübâbe Hatun’un Eminönü’ndeki manav dükkânının üçte bir hissesini kiraya verdiği Husûs-ı âti’l-beyânın mahâllinde ketb ü tahrîri için bi’t-taleb kıbel-i şer‘-i enverden irsâl olunan Merhabazâde Mahmud Efendi mahmiye-i İslambol’da Eminönü’nde Kahveci Gümrüğü altında vâki‘ bir bâb manav dükkânına varıp huzûr-ı Müslimînde akd-i meclis-i şer‘-i âlî eyledikde İslambol’da Hobyar mahallesinde sâkine Sadr-ı esbak merhûm Abdullah Paşa halîlesi Lübâbe Hatun bt. Abdullah tarafından vekîl-i müseccel-i şer‘îsi Mustafa Ağa b. Abdülkadir nâm kimesne meclis-i ma‘kūd-ı mezkûrda Hadîce ve Rukiye nâm hatunlar hâzıralar oldukları hâlde hemşîreleri bâ‘isetü’l-kitâb Afife bt. Halil nâm hatunun zevci ve vekîl-i şer‘îsi el-Hâc Mustafa mahzarında ikrâr-ı tâm ve takrîr-i kelâm edip dükkân-ı mezkûrun derûnunda mevcûd beyne’l-hiref gedik ta‘bîr olunur ber-mûceb-i defter-i müfredât terâzi ve kantar ve küfe ve tabla ve sâir âlât-ı lâzıme-i ma‘lûmenin sülüsânı hâzıretân-ı mezbûretânın ve sülüs-i âharı müvekkile-i mezbûre Afife Hatun’un yedlerinde ırsen mâlları olmağla dükkân-ı mezkûrun sâhil-i bahr tarafında iki kepengi müvekkile-i mezbûre Afife Hatun hissesi için pazarbaşı vekîli ve sâir ihtiyâr usta[ları] ma‘rifetiyle ifrâz ve ta‘yîn ve icâre-i kadîmesi olan beher şehr dörder guruşa müvekkile-i mezbûre Afife Hatun’a bi’l-vekâle îcâr ve teslîm eylediğimde ol dahi ber-vech-i muharrer istîcâr ve kabûl edip fîmâ-ba‘d dükkân-ı mezkûrun sülüsânına hâzıretân-ı mezbûretân mutasarrıfeler olup ve ber-minvâl-i muharrer ifrâz olunan sülüsüne dahi mezbûre Afife Hatun mutasarrıfe olup ve icâre-i kadîmesi olan dörder guruşu müvekkilem mezbûre Lübâbe Hatun tarafına edâ ve teslîm oldukça asla ve kat‘a ta‘arruz ve müdâhale etmemek üzere müvekkilem mezbûre Lübâbe Hatun ta‘ahhüd eyledi dedikde merkūm el-Hâc Mustafa dahi vekîl-i mezbûr Mustafa’yı cemî‘ kelimât-ı meşrûhasında vicâhen ve şifâhen tasdîk ve tahkīk eylediğini kâtib-i merkūm mahâllinde ketb ü tahrîr ba‘dehû ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 8 Rebî‘ülevvel sene 1184. Şuhûdu’l-hâl: Pazarbaşı Vekîli es-Seyyid Mehmed Ağa, Ahmed Ağ, Hüseyin Yazıcı, Yusuf b. Ali, diğer Hüseyin Yazıcı.