İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 103 Hüküm no: 62 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Elvanzade mahallesi imâmı Ebûbekir Efendi’nin imâmet için vekil tayin ettiği Mahmiye-i İslambol’da Unkapanı dâhilinde Elvanzâde mahallesi imâmı el-Hâc Ebûbekir Efendi b. Ömer meclis-i şer‘-i şerîf-i enverde ahâlî-i mahalleden İsmail Çelebi b. Ömer ve Yusuf Çavuş b. Osman ve el-Hâc Mehmed b. Ali ve Kâtib es-Seyyid Feyzullah Efendi b. Abdülkadir ve el-Hâc Osman b. el-Hâc Hasan ve el-Hâc Mustafa b. Abdullah ve Hüseyin Çelebi b. Mehmed ve es-Seyyid Hasan b. Hüseyin ve Hâfız Abdurrahman b. el-Hâc Mehmed ve Hâfız Mehmed Emin Efendi b. el-Hâc Ebûbekir ve Haffâf el-Hâc İbrahim b. Mehmed ve sâirleri hazırlar oldukları hâlde işbu râfi‘u’l-vesîka Hâfız Mustafa Efendi b. el-Hâc Mustafa mahzarında ikrâr ve takrîr-i kelâm edip ben berat-ı âlîşân ile mahalle-i mezbûre imâmı olup lâkin bi’n-nefs imâmet-i mezkûrenin hizmet-i lâzımesini rü’yet edemeyip tarafımdan mansûb vekîlimi ahâlî-i mahalle-i mezbûre hâzırûn-ı merkūmûn iltimâslarıyla vekâletden azl ve ihrâc edip hizmet-i mezkûreyi kemâ-yenbagī edâya kādir ve her vechile mahall ü müstahık ve muhtâr-ı cemâ‘at olan işbu merkūm Hâfız Mustafa Efendi’yi ahâlî-i hâzırûn-ı merkūmûn talebleriyle tarafımdan vekîl ve nâib-i menâb nasb ü ta‘yîn eyledim dedikde ol dahi vekâlet-i mezbûreyi kabûl ve hizmet-i lâzımesini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. [24a] Fi’l-yevmi’r-râbi‘ ve’l-ışrîn min-Saferü’l-hayr li-sene erba‘a ve semânîn ve mie ve elf. Şuhûdu’l-hâl: Mehmed Ağa b. Ahmed, Ali Çelebi, Molla İsmail b. Ali, Muhzır Mustafa.