İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 104 Hüküm no: 63 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefere çıkan ordu için bedesten esnafından istenilen dört çadır için altı yüz beş kuruş alındığı İşbu sâl-i meymenet-iştimâlde vâki‘ sefer-i hümâyûn-ı nusret-makrûn için mahmiye-i İstanbul esnâfının mükemmel ve müretteb [ordu ihrâcı bâbında] ordu-yı hümâyûn ağası ta‘yîn buyrulan Dergâh-ı âlî kapıcıları zâbitânından Hüseyin Ağa b. el-Hâc Mahmud yediyle fermân-ı âlî sâdır olmağın imtisâlen-leh mahmiye-i mezbûrede vâki‘ bezzâzistân ma‘a abacıyân esnâfı üzerlerine ihrâcı lâzım gelen dört aded hayme ile ordu ihrâcı için orducu nasb ü ta‘yîn eden esnâf-ı mezbûrenin kethudâları İsmail Ağa ve Yiğitbaşıları Molla Ahmed ve ustalarından el-Hâc Mustafa ve diğer el-Hâc Mustafa ve Hasan Ağa ve Ahmed Ağa ve Mehmed Necib Efendi ve Halil Ağa ve Meci el-Hâc Mustafa ve Mustafa Efendi ve diğer el-Hâc Mustafa ve İbrahim ve es-Seyyid el-Hâc Mehmed Ağa ve el-Hâc İsmail ve es-Seyyid el-Hâc Mustafa ve âhar el-Hâc Mustafa ve sâirleri meclis-i şer‘-i şerîf-i enverde dülbendci ve kıymacı ve bogasıcı ve yağlıkçı esnâfının kethudâları ve yiğitbaşıları mahzarlarında herbiri takrîr-i kelâm ve ta‘bîr ani’l-merâm edip ber-mûceb-i emr-i âlî ve defter-i mevkūfât-ı hakānî üzerimize ihrâcı lâzım gelen dört hayme ile ordu mesârifi’çün zikrolunan dülbendci ve kıymacı ve bogasıcı ve yağlıkçı esnâfı ber-mûceb-i teşrîfât bizim esnâfımıza yamak kaydolunduğu mastûr ve mukayyed olup ve kadîmü’l-eyyâmdan beri her bâr sefer-i hümâyûn vukū‘unda bizim esnâfımıza imdâd edegelmeleriyle işbu bin yüz seksen üç senesi Martı içinde Babadağı nâm merhalede sâye-endâz-ı iclâl olan ordu-yı hümâyûnda mevcûd bulunmak üzere bezzâz esnâfı mezbûrûn üzerlerine ihrâcı lâzım gelen dört hayme ile ordu mesârifı’çün dülbendci esnâfının kadîmden imdâd edegeldikleri üç yüz guruşu ve yağlıkçı esnâfının doksan guruşu ve bogasıcı esnâfının doksan guruşu ve kıymacı esnâfının dahi yüz yirmi beş guruşu mezbûrûn dülbendci ve yağlıkçı ve bogasıcı ve kıymacı esnâfından herbirinin kethudâ ve yiğitbaşıları ve sâirleri yedlerinden tamamen ahz u kabz eyledik fîmâ-ba‘d imdâdiye-i mezkûre cem‘an altı yüz beş guruşdan esnâf-ı mezbûrûn yedlerinde bir akçe ve bir habbe bâkī kalmamağla husûs-ı mezbûra müte‘allika âmme-i da‘vâdan esnâf-ı mezbûrûnun zimmetlerini ibrâ-i âm ile ibrâ ve ıskāt eyledik dediklerinde onlar dahi mukırrûn-ı mezbûrûnu vicâhen ve şifâhen tahkīk ve tasdîk etmeleriyle işbu vesîka alâ-mâ hüve’l-hakīka bi’t-taleb ketb ve imlâ olundu. Fî 11 Rebî‘ülevvel sene [1]184. Şuhûdu’l-hâl: Baltacı Mustafa b. Hüseyin, Molla İsmail b. Ali, Muhzır Mehmed Odabaşı, Muhzır Ali Çelebi.