İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 105 Hüküm no: 64 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısırlı Mehmed’in oğullarının Küçükçekmece’deki çiftliklerini satıp bazı arazilerinin de kullanım hakkını devrettikleri Mahmiye-i İslambol’da Mollagürânî kurbünde Seydi Bey mahallesinde sâkinler Ahmed Ağa ve İbrahim Ağa ibney Mısırlı el-Hâc Mehmed nâm karındaşlar meclis-i şer‘-i şerîf-i enverde mefharu’l-emâcid ve’l-ekârim işbu sahibü’l-kitâb Ali Efendi b. Abdurrahman tarafından vech-i âtî üzere vekîl-i şer‘îsi olan Bostânî Selim Ağa b. Mehmed mahzarında herbiri ikrâr-ı tâm ve takrîr-i kelâm edip işbu yedimizde hüccet-i şer‘iyeler mantûklarınca ale’l-iştirâki’s-seviy yedimizde mülkümüz olup Havâss-ı refi‘a kazâsına muzâfe Küçükçekmece nâhiyesine tâbi‘ Ankorya karyesinde vâki‘ beyne’l-ahâlî ve’l-cîrân ma‘lûmü’l-hudûd fevkānî iki bâb oda ve bir sofa ve kenîf ve tahtânî ahır ve anbâr ve samanhâne ve havluyu muhtevî çiftlik ta‘bîr olunur mülk menzilimi cümle tevâbi‘ ve levâhıkıyla tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile müvekkil-i mûmâ-ileyh Ali Efendi’ye üç yüz guruşa bey‘ ve temlîk ve mahâllinde teslîm ve çiftlik-i mezkûra teba‘iyyet ile zirâ‘at ve harâset olunur merhûm Sultân Bâyezid-i Velî Vakfı’ndan bâ-temessük-i mütevellî taht-ı tasarrufumuzda olan ma‘lûmü’l-hudûd ve’l-kıt‘a tarlalar ve mer‘âlarımızı dahi bâ-ma‘rifet-i mütevellî-i vakf-ı mezbûr beş yüz guruş bedel mukābelesinde ferâğ-ı mu‘teber-i kat‘î ile yine müvekkil-i mûmâ-ileyh Ali Efendi’ye ferâğ ve tefvîz eylediğimizde işbu vekîl-i merkūm Selim Ağa dahi ber-vech-i muharrer bi’l-vekâle iştirâ ve temellük ve tesellüm ve tefevvüz ve kabûl eyledikden sonra semen-i mezkûr üç yüz guruş ile bedel-i mezkûr beş yüz guruş ki cem‘an sekiz yüz guruşu müvekkil-i mûmâ-ileyh mâlından vekîl-i merkūm Selim Ağa yedinden bi’l-münâsafa tamamen ve kâmilen ahz u kabz eyledik ba‘de’l-yevm sâlifü’z-zikr çiftlik ta‘bîr olunur mülk menzil cemî‘ müştemilâtıyla müvekkil-i mûmâ-ileyh Ali Efendi’nin mülk-i müşterâsı ve hakk-ı sırfı ve mârrü’z-zikr tarlalar ve mer‘âlar dahi dâhil-i havza-i tasarrufu olup kat‘a bizim alâka ve medhalim kalmamışdır keyfe mâ yeşâ ve ve hasbemâ yahtâr mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb ü imlâ olundu. Fî-selhi şehri Rebî‘i’l-evvel li-sene erba‘a ve semânîn ve mie ve elf min-hicreti men lehu’l-izzü ve’ş-şeref. Şuhûdu’l-hâl: Mustafa Ağa b. Abdullah, Ali Ağa b. Halil Ağa, Hasan Ağa b. Mehmed, Osman Efendi b. Abdullah, Şerîf es-Seyyid Mehmed Efendi b. ( ), el-Hâc İsmail b. Mehmed, el-Hâc Halil b. İbrahim, Feyzullah Ağa b. Ali, Müderrisîn-i kirâmdan es-Seyyid Es‘ad Efendi.