İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 106 Hüküm no: 65 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Ali Efendi’nin Küçükçekmece’deki çiftliğini Mısırlı Mehmed’in oğullarına sattığı Mahmiye-i İslambol’da Seydi Bey mahallesinde sâkin eşrâf-ı kuzât-ı kirâm-ı zevi’l-ihtirâmdan el-Hâc Ali Efendi b. el-Hâc Rasûl tarafından husûs-ı âti’l-beyânı ikrâra vekîl olduğu el-Hâc Halil b. İbrahim ve el-Hâc İsmail b. Mehmed nâm kimesneler şehâdetleriyle sâbit olan Osman Efendi b. Abdullah meclis-i şer‘-i şerîf-i enverde müteveffâ Mısırlı el-Hâc Mehmed b. Abdullah’ın sulbî kebîr oğulları işbu bâ‘isü’l-kitâb Ahmed Ağa ve İbrahim nâm kimesneler mahzarlarında bi’l-vekâle ikrâr-ı tâm ve takrîr-i kelâm edip işbu bir kıt‘a hüccet-i şer‘iye mantûkunca müvekkilim mûmâ-ileyh el-Hâc Ali Efendi yedinde mülkü olup Havâss-ı refi‘a kazâsına muzâfe Küçükçekmece nâhiyesine tâbi‘ Ankorya karyesinde vâki‘ beyne’l-ahâlî ve’l-cîrân ma‘lûmü’l-hudûd iki bâb fevkānî oda ve bir sofa ve kenîf ve tahtânî ahır ve anbâr ve samanhâne ve havluyu muhtevî çiftlik ta‘bîr olunur mülk menzilini cümle-i tevâbi‘ ve levâhıkıyla tarafeynden îcâb ve kabûlü hâvî bey‘-ı bâtt-ı sahîh-i şer‘î ile mezbûrân Ahmed Ağa ve İbrahim Ağa’ya mütesâviyen üç yüz guruşa bey‘ ve temlîk ve mahâllinde kendileri teslîm ve çiftlik-i mezbûra teba‘iyyet ile zirâ‘at ve harâset olunur merhûm Sultân Bâyezid-i Velî Vakfı’ndan ma‘lûmü’l-hudûd ve’l-kıt‘a taht-ı tasarrufunda olan tarlaları ve mer‘âlarını dahi bâ-ma‘rifet-i mütevellî-i vakf-ı merkūm mezbûrân Ahmed Ağa ve İbrahim Ağa’ya beş yüz guruş bedel mukābelesinde ferâğ-ı mu‘teber-i kat‘î ile mütesâviyen ferâğ ve tefvîz eylediğinde onlar dahi ber-minvâl-i muharrer iştirâ ve temellük ve tesellüm ve tefevvüz ve kabûl eylediklerinden sonra semen-i mezkûr üç yüz guruş ile bedel-i merkūm beş yüz guruş ki cem‘an sekiz yüz guruşu müvekkilim mûmâ-ileyh el-Hâc Ali Efendi mezbûrân Ahmed Ağa ve İbrahim Ağa yedlerinden tamamen ve kâmilen ahz u kabz eyledi ba‘de’l-yevm sâlifü’z-zikr çiftlik ta‘bîr olunur mülk menzil cemî‘ müştemilâtıyla mezbûrân Ahmed Ağa ve İbrahim Ağa’nın ale’l-iştirâki’s-seviy mülk-i müşterâları ve hakk-ı sırfları ve zikrolunan tarlalar ve mer‘âlar dahi dâhil-i havza-i tasarrufu olup müvekkilim mûmâ-ileyhin kat‘a alâka ve medhali kalmamışdır diledikleri gibi mutasarrıf olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-işrîn min-şehri Rebî‘i’l-evvel li-sene erba‘a ve semânîn ve mie ve elf. Şuhûdu’l-hâl: Mustafa Ağa b. Abdullah, Ali Ağa b. Halil, Hasan Ağa b. Mehmed, Osman Efendi b. Abdullah, Şerîf es-Seyyid Mehmed Efendi, el-Hâc İsmail b. Mehmed, el-Hâc Halil b. İbrahim, Feyzullah b. Ali, Müderrisîn-i kirâmdan es-Seyyid Es‘ad Efendi