İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 107 Hüküm no: 66 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İki aydan beri kayıp olan Süleyman’ın işlettiği hamamın gedik tabir olunan eşyasının tayin olunan kayyım vâsıtasıyla satıldığı Mahmiye-i İstanbul’da Yedikule’de vâki‘ Nâile Hanım bt. el-merhûm Râgıb Mehmed Paşa ve Mâhire Kadın bt. Abdullah’ın bi’l-icâreteyn mutasarrıfe oldukları ma‘lûmü’l-hudûd hamamın müşâhereten müste’ciri olan Hamamcı el-Hâc Süleyman b. Abdullah nâm kimesne iki aydan beri hamam-ı mezkûru eşyâsıyla meşgūle iken bilâ-hâfız ve bilâ-vekîl bırakıp firâr ve gaybet edip gāib-i merkūmun hâli mütebeyyin oluncaya değin hamam-ı mezkûrda eşyâsının telef ve zâyi‘ olmak ihtimâli gālib olduğu ihbâr olunduğuna binâen eşyâ-i mezkûreyi semen-i misliyle âhara bey‘e kıbel-i şer‘den [25a] bir kayyım nasbı lâ-büd ve mühim olmağın hamam-ı mezkûrda kahveci olan Yakub Beşe b. Salih nâm kimesne emîn ve mu‘temed ve perhizkâr ve müstakīm ve dîndâr ve her vechile kayyımlık uhdesinden gelmeğe kādir olduğu zeyl-i sahîfede muharrerü’l-esâmî sikāt-ı Müslimîn haberleriyle mütehakkık olmağın hâkim-i muvakkı‘-ı sadr-ı kitâb tûbâ lehû ve hüsnü-meâb efendi hazretleri dahi merkūm Yakub Beşe’yi gāib-i mezbûrun ber-mûceb-i defter-i müfredât gedik i‘tibâr olunan eşyâ-i mezkûresini semen-i misilleriyle bey‘e kayyım nasb ü ta‘yîn buyurduklarında ol dahi ber-vech-i muharrer kayyımlığı kabûl ve merâsimini edâya ta‘ahhüd ve iltizâm eyledikden sonra mezbûr Yakub Beşe meclis-i şer‘de hamam-ı mezkûrda hâlâ müste’cire olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Rukiye bt. İbrahim nâm hatun mahzarında ikrâr ve takrîr-i kelâm edip gāib-i merkūmun hamam-ı mezkûrda gedik i‘tibârıyla mevcûde semen-i misilleriyle ber-vech-i muharrer kıbel-i şer‘den âhara bey‘e me’zûn olduğum otuz iki çift karyola ve bir Selanik peştemal ve yirmi beş çift zehli döşeme ve beş çift mihrâblı döşeme ve iki çift cedîd Bursa peştemal ve dört çift satrancî döşeme ve doksan iki nevbet havlusu ve on iki karınca ayağı havlu ve iki karınca ayağı gömlek ve bir karınca ayağı boğça ve yirmi bir leblebi makrame ve iki çift karınca ayağı makrame ve bir müsta‘mel boğça ve on bir kaliçe seccâde ve on beş kırmızı şilte ve on bir merdiven yasdığı ve dokuz sagīr kırmızı yasdık ve on tas ve on sekiz çift na‘lîn ve dört âyine ve iki piştahta ve bir şam‘dân ve bir hilâlî buhûrdân ve bir koğa ma‘a hâlât ve bir re’s bargirini tarafeynden îcâb ve kabûlü hâvî bey‘-ı bâtt-ı sahîh-i şer‘î ve safka-i vâhide ile merkūme Rukiye Hatun’a semen-i misli idüğü ihbâr olunan yedi yüz on buçuk guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūmu gāib-i merkūmun bâ-temessük cihet-i karzdan merkūme Rukiye Hatun’a mukırr u mu‘terif olduğu dokuz yüz altmış guruş deyninin yedi yüz on buçuk guruşa takās ve mahsûb eylediğimde ol dahi ber-vech-i muharrer mukāssa ve kabûl edip ol vechile hamam-ı merkūm derûnunda mevcûde gedik i‘tibâr olunan eşyâ-i mezbûreden gāib-i mezbûrun kat‘a alâka ve medhali kalmayıp mezbûre Rukiye Hatun’un mülk-i müşterâsı olmuşdur dedikde mezbûre Rukiye Hatun dahi mukırr-ı mezbûr Yakub Beşe’yi vicâhen ve şifâhen tahkīk ve tasdîk etmeğin mâ-vaka‘a bi’t-taleb ketb olundu. Fî-gurret-i Rebî‘ülevvel sene 1184. Şuhûdu’l-hâl: el-Hâc Hasan Ağa b. el-Hâc Mehmed, Yedikule Ağası Ahmed Ağa b. Hasan, el-Hâc Ahmed, es-Seyyid Mehmed Beşe b. Osman, Kethudâ el-Hâc Mehmed, Yedikule Çavuşu Mustafa b. Ali, Hâfız Osman Efendi b. İbrahim, Çukadâr İsmail b. İsmail.