İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 115 Hüküm no: 72 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fırın ustası Hamparsom ve ortağının birer çörekçi ve ekmekçi fırınları ile değirmendeki gedik hisselerini sattıkları Habbâz tâifesinden medîne-i Üsküdar’da Kolluk karşasında vâki‘ fırın ustalarından Hamparsom v. Takis nâm zimmî kendi nefsinden asîl ve şerîki Akındos v. Melkon nâm zimmî tarafından husûs-ı âti’l-beyânda vekîl olduğu Kazer v. Haçuk ve Ağya v. Avanis nâm zimmîler şehâdetleriyle sâbit olmağla mersûm Hamparsom zimmî meclis-i şer‘-i şerîf-i enverde işbu bâ‘iseyi’l-kitâb Molla Ali b. el-Hâc Mehmed ve Molla Mehmed b. Hüseyin nâm kimesneler mahzarlarında bi’l-asâle ve bi’l-vekâle ikrâr-ı tâm ve takrîr-i kelâm edip sâlifü’z-zikr Kolluk karşısında vâki‘ beyne’l-ahâlî ma‘lûmü’l-hudûd bir bâb ekmekçi fırını derûnunda kâin çörekçi fırını ve Balaban İskelesi başında vâki‘ ekmekçi fırını ve zikrolunan fırınlara merbût ve müte‘ayyin altı horoslu değirmen derûnuna mevcûde yirmi dört re’s bargirler ile sâir ber-mûceb-i defter-i müfredât âlât-ı lâzıme ve eşyâ-i ma‘lûmenin üç sehim i‘tibârıyla iki sehmi şerîkim müvekkilim mersûm Akındos zimmî ile benim münâsafeten yedimizde mülk ve hakkımız ve bir sehmi mezbûr Ali’nin mülkü olmağla zikrolunan fırınlar ve değirmende gedik ta‘bîr olunan bargirler ve bi’l-cümle sâir âlât-ı lâzıme ve eşyâ-i ma‘lûmeden mâlik olduğumuz on altı re’s bargirler ile âlât-ı lâzıme ve eşyâ-i ma‘lûmenin on re’sini bin dört yüz guruşa mezbûr Molla Ali’ye ve altı re’sini altı yüz guruşa mezbûr Molla Mehmed’e tarafeynden îcâb ve kabûlü hâvî bey‘-ı bâtt-ı sahîh-i şer‘î ve safka-i vâhide [28a] ile mezbûrân Molla Ali ve Molla Mehmed’e ber-minvâl-i muharrer bi’l-asâle ve bi’l-vekâle bey‘ ve temlîk ve teslîm eylediğimizde onlar dahi ber-vech-i muharrer iştirâ ve temellük ve tesellüm eylediklerinden sonra semeneyn-i mezkûreyn cem‘an iki bin guruşu mezbûrân Molla Ali ve Molla Mehmed yedlerinden bi’l-asâle ve bi’l-vekâle tamamen ve kâmilen ahz u kabz edip bey‘-ı mezkûrun tağrîr ve gabnine ve istifâ-i semene ve bi’l-cümle gedik husûsuna müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz âharın ibrâsını kabûl eyledik min-ba‘d mârrü’z-zikr fırınlar ve değirmen derûnunda mevcûde bargirler ve bi’l-cümle sâir âlât-ı lâzıme ve eşyâ-i ma‘lûmeden [mâlik olduğumuz] on re’s [bargir] Molla Ali’nin ve altı re’s mezbûr Molla Mehmed’in mülk-i sahîh ve hakk-ı sarîhleri olup benim ve şerîkim müvekkilim mersûm Akındos zimmînin kat‘a alâka ve medhalim kalmamışdır dedikde gıbbe’t-tasdîkı’ş-şer‘î mezbûrân Molla Ali ve Molla Mehmed şurût-ı nizâmları üzere sayf ve şitâda altı aylık zahîre der-anbar edip hilâf-ı emr-i âlî ve mugāyir-i nizâm kat‘a bir türlü vaz‘ u hareket etmemek üzere ta‘ahhüd etmeleriyle mâ-vaka‘a bi’t-taleb ketb olundu. Fî 3 Rebî‘ülâhir sene 1184. Şuhûdu’l-hâl: Ekmekçiler Kethudâsı Ali Ağa, Uncular Kethudâsı Mustafa Ağa, es-Seyyid el-Hâc Ebûbekir, Kanlıfırın Ustası Ahmed Ağa, Galatalı es-Seyyid el-Hâc Mehmed, Yiğitbaşı Molla Osman, Salıcı Molla Osman.