İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 118 Hüküm no: 74 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koğas v. Akindos’un Kâtib Kasım mahallesindeki mülk menzilini Meryem Ana Kilisesi Vakfı’na sattığı Mahmiye-i İslambol’da Kâtib Kasım mahallesinde mütemekkin Koğas v. Akindos nâm zimmî meclis-i şer‘-i şerîf-i enverde Cerrâh İshak mahallesinde vâki‘ Meryem Ana Kenîsesi’nin avârız hânesi vakfının mütevellîsi ve vakf-ı mezkûrdan hâsıla gallenin ziyâ‘ ihtimâline binâen akāra tebdîline me’zûn olan işbu bâ‘isü’r-rakīm Agop v. Melkon nâm zimmî muvâcehesinde ikrâr-ı tâm ve takrîr-i kelâm edip işbu mübâya‘a hüccetleri mantûklarınca şirâen yedimde mülküm olup mârrü’z-zikr Kâtib Kasım mahallesinde vâki‘ bir tarafdan Basmacı Mikayil menzili ve bir tarafdan Papa Makakya menzili ve bir tarafdan Oseb arsası ve bir tarafdan tarîk-i âm ile mahdûd terbî‘an yüz seksen beş zirâ‘ arsa üzerinde mebnî tabaka-i ulyâda bir bâb oda ve bir sofa ve tahta-pûş ve kenîf ve vüstâda bir bâb oda ve matbah ve süflâda bir bâb oda ve bir kârgir mahzen ve su kuyusu ve kenîf ve eşcâr-ı müsmire ve gayr-ı müsmireli bahçe ve derûn-ı bahçede bir köşk ve bir mikdâr havluyu muhtevî bir bâb mülk menzilimi cümle tevâbi‘ ve levâhıkıyla tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile vakf-ı merkūm için mütevellî-i merkūm Agop zimmîye üç bin guruşa bey‘ ve teslîm eylediğimde ol dahi ber-vech-i muharrer iştirâ ve tesellüm eyledikden sonra semeni olan meblağ-ı mezbûrun dört yüz guruşunu galle-i vakf-ı mezbûrdan mütevellî-i mersûm Agop yedinden ahz u kabz edip menzil-i mahdûd-ı mezkûr vakf-ı merkūm müsakkafâtından oldukdan sonra mütevellî-i mersûm Agop zimmî bir kıt‘a temessük mantûkunca menzil-i mahdûd-ı mezkûru iki bin dört yüz guruş icâre-i mu‘accele ve beher yevm ikişer akçe müeccele ile cânib-i vakıfdan bi’t-tevliye bana îcâr ve teslîm ve semeninden bâkī iki bin dört yüz guruşu icâre-i mu‘accele-i mezkûra iki bin dört yüz guruşa takās ve mahsûb eyledikde ben dahi ber-vech-i muharrer istîcâr ve tesellüm ve mukāssa ve kabûl edip bey‘-ı mezbûrun gabn ve tağrîrine ve icâre-i mu‘accele-i mezbûre iki bin dört yüz guruşun adem-i istifâsına müte‘allika âmme-i da‘vâdan cânib-i vakf-ı mezbûr ile zimmet-i mütevellî-i mersûmu ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb ü imlâ olundu. Fi’l-yevmi’s-sâdis min-Rebî‘i’l-âhir li-sene erba‘a ve semânîn ve miete ve elf. Şuhûdu’l-hâl: Mehmed Ağa b. Ahmed vekîl-i kethudâ-yı muhzırân, Ali Çelebi b. Abdullah, el-Hâc Mustafa b. Hasan, Molla İsmail b. Ali, Araboğlu Muhzır Mehmed Çelebi, Papa Kirkor v. Sekyas, Papa Haçador v. Bogos, Papa Kalos v. Bedros, Abraham v. Yoseb, Avanis v. Kirkor.