İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 119 Hüküm no: 75 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Badrofi bt. İsayi’nin Şeyhferhad mahallesindeki mülk menzilini Meryem Ana Kilisesi Vakfı’na sattığı Mahmiye-i İslambol’da Şeyhferhad mahallesinde sâkine ve şahsı ta‘rîf-i şer‘î ile mu‘arrefe olan Badrofi bt. İsayi nâm Nasrâniye meclis-i şer‘-i şerîf-i enverde mahmiye-i mezbûrede Cerrâh İshak mahallesinde vâki‘ Meryem Ana Kenîsesi’nin avârız hânesi vakfının mütevellîsi ve vakf-ı mezkûrdan hâsıla gallenin ziyâ‘ ihtimâline binâen akāra tebdîline me’zûn olan işbu bâ‘isü’r-rakīm Agop v. Melkon nâm zimmî muvâcehesinde ikrâr-ı tâm ve takrîr-i kelâm edip bâ-hüccet-i şer‘iye yedimde mülküm olup mârrü’z-zikr Şeyhferhad mahallesinde vâki‘ bir tarafdan Aci Sahyos menzili ve bir tarafdan Avanis zimmî menzili ve bir tarafdan Elmas Nasrâniye menzili ve bir tarafdan tarîk-i âm ile mahdûd terbî‘an yüz zirâ‘ arsa üzerinde mebnî fevkānî iki bâb oda ve tahta-pûş ve köşk ve kenîf ve tahtânî bir bâb oda ve bi’r-i mâ ve bir mikdâr havluyu müştemil bir bâb mülk menzilimi cümle tevâbi‘ ve levâhıkıyla tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile vakf-ı mezbûr için mütevellî-i mersûm Agop zimmîye bin guruşa bey‘ ve teslîm eylediğimde ol dahi ber-vech-i muharrer iştirâ ve tesellüm eyledikden sonra semeni olan meblağ-ı mezbûrun üç yüz guruşunu galle-i vakf-ı mezbûrdan mütevellî-i mersûm yedinden ahz u kabz edip menzil-i mezkûr vakf-ı merkūm müstegallâtından oldukdan sonra mütevellî-i mersûm Agop zimmî bir kıt‘a temessük mantûkunca menzil-i mezkûru yedi yüz guruş icâre-i mu‘accele ve yevmî iki akçe icâre-i müeccele ile cânib-i vakıfdan bi’t-tevliye bana îcâr ve teslîm ve semeninden bâkī yedi yüz guruşu icâre-i mu‘accele-i mezkûre yedi yüz guruşa takās ve mahsûb eyledikde ben dahi ber-vech-i muharrer istîcâr ve tesellüm ve mukāssa ve kabûl edip bey‘-ı mezkûrun gabn ve tağrîrine ve icâre-i mu‘accele-i mezkûrenin adem-i istifâsına müte‘allika âmme-i da‘vâdan cânib-i vakf-ı mezbûr ile zimmet-i mütevellî-i mersûm Agop zimmîyi ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-şehri Rebî‘i’l-âhir li-sene erba‘a ve semânîn ve miete ve elf. Şuhûdu’l-hâl: Mehmed Ağa b. Ahmed vekîl-i kethudâ-yı muhzırân, Ali Çelebi b. Abdullah, el-Hâc Mustafa b. Hasan, Molla İsmail b. Ali, Araboğlu Muhzır Mehmed Çelebi, Papa Kirkor v. Sekyas, Papa Haçador v. Bogos, Papa Kalos v. Bedros, Abraham v. Yoseb, Avanis v. Kirkor.