İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 120 Hüküm no: 76 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ahmed’in babasından intikal eden çeşmenin sakalığı gediğine müdâhalede bulunulduğu iddiasıyla açtığı davada sulh olduğu Medîne-i Eyüb’de Otakçılar’da sâkine ve zâtı ta‘rîf-i şerîf ile mu‘arrefe olan Âişe bt. Ahmed nâm hatun meclis-i şer‘-i şerîf-i enverde işbu bâ‘isü’l-kitâb Saka Hasan Beşe b. Ali nâm kimesne mahzarında ikrâr-ı tâm ve takrîr-i kelâm edip İslambol’da Balıkpazarı Kapısı dâhilinde vâki‘ çeşmenin saka gediğine babam mezbûr Ahmed mutasarrıf iken fevt oldukda benimle kız karındaşım Emine Hatun’a intikāl edip ba‘dehû zevcim gāib ani’l-beled Ali nâm kimesne merkūmda bir müddet sakalık edip ber-minvâl-i muharrer kız karındaşım mezbûre ile bana intikāl eden saka gediğini zevcim gāib-i mezbûr Ali işbu mezbûr Hasan Beşe’ye üç yüz guruş bedel mukābelesinde ferâğ eyledikde mezbûr Hasan Beşe bedel-i mezkûrun yüz yetmiş guruşunu kız karındaşım mezbûre Emine’ye def‘ u teslîm ve mâ‘adâsı olan yüz otuz guruşu kendide kalmağla bedel-i mezkûrdan bâkī meblağ-ı mezbûr yüz otuz guruşu bana versin yahud zikrolunan saka gediğinden keff-i yed etsin deyü mezbûr Saka Hasan Beşe’den bu esnâda da‘vâya tesâddî etmişidim el-hâletü hâzihî mezbûr Hasan Beşe bana mâlından bi-tarîkı’t-teberru‘ on beş guruş def‘ u teslîm ben dahi ber-vech-i muharrer yedinden ahz u kabz ve umûruma sarfla istihlâk eylediğimden sonra ber-vech-i muharrer tesâddî eylediğim da‘vâmdan fâriğa olup husûs-ı mezkûra müte‘allika âmme-i de‘âvî ve kâffe-i mutâlebâtdan mezbûr Hasan Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi bana medfû‘u olan meblağ-ı müstehleke-i mezbûra müte‘allika da‘vâdan benim zimmetimi ibrâ ve ıskāt ve herbirimiz âharın ibrâsını kabûl eyledik min-ba‘d kendi ile asla ve kat‘a da‘vâ ve nizâ‘ım kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 Rebî‘ülâhir sene 1184. Şuhûdu’l-hâl: Mukayyid Merhabazâde Mahmud Efendi, Mehmed Ağa b. Ahmed vekîl-i kethudâ-yı muhzırân, Araboğlu Mehmed Çelebi.