İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 121 Hüküm no: 77 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimyon v. Karabet ve eşinin Şeyhferhad mahallesindeki mülk menzillerini Meryem Ana Kilisesi Vakfı’na sattıkları Mahmiye-i İslambol’da Şeyhferhad mahallesinde mütemekkin Dimyon v. Karabet nâm zimmî kendi nefsinden asîl ve zevcesi Sima bt. Sarrâf Kigork v. Sahyos nâm Nasrâniye tarafından husûs-ı âti’l-beyânda vekîl olduğu şahsı mersûmeyi ârifân Besici Kigork v. Zedin ve Hamparsom v. Takis nâm zimmîler şehâdetleriyle sâbit olmağla mersûm Dimyon meclis-i şer‘-i şerîf-i enverde mahmiye-i mezbûrede Cerrâh İshak mahallesinde vâki‘ Meryem Ana Kenîsesi’nin avârızı vakfının mütevellîsi ve hâsıl olan gallenin ziyâ‘ ihtimâline binâen akāra tebdîline me’zûn olan işbu bâ‘isü’r-rakīm Agop v. Melkon nâm zimmî muvâcehesinde bi’l-asâle ve bi’l-vekâle ikrâr-ı tâm ve takrîr-i kelâm edip akd-i âti’z-zikrin sudûruna değin zevcem müvekkilem mersûme Sima Nasrâniye ile bâ-hüccet-i şer‘iye ale’l-iştirâki’s-seviy yedimizde mülkümüz olup mârrü’z-zikr Şeyhferhad mahallesinde vâki‘ bir tarafdan vakf-ı mezbûrdan Serpohi Nasrâniye menzili ve bir tarafdan yine vakf-ı mezbûrdan Agop zimmî menzili ve bir tarafdan Sarrâf Melcan menzili ve bir tarafdan tarîk-i âm ile mahdûd terbî‘an iki yüz on beş zirâ‘ arsada mebnî fevkānî iki bâb oda ve sofa ve dehliz ve kenîf ve tahtânî matbah ve hamam ve câmekân ve kenîf ve zîr-i zemîn kârgir iki bâb mahzen ve bi’r-i mâ ve süb‘ masûra mâ’-i lezîz ve bir mikdâr bahçe ve etrâf-ı erba‘adan taş duvarı müştemil mülk menzilimizi cümle tevâbi‘ ve levâhıkıyla tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile vakf-ı mezbûr için mütevellî-i mersûm Agop zimmîye üç bin guruşa bil-asâle ve bi’l-vekâle bey‘ ve teslîm eylediğimde ol dahi ber-vech-i muharrer iştirâ ve tesellüm eyledikden sonra semeni olan meblağ-ı mezkûrun beş yüz guruşunu galle-i vakf-ı mezbûrdan mütevellî-i mersûm yedinden ahz u kabz edip menzil-i mahdûd-ı mezkûr vakf-ı merkūm müstegallâtından oldukdan sonra mütevellî-i mersûm Agop zimmî bir kıt‘a temessük mantûkunca menzil-i mezkûru iki bin beş yüz guruş icâre-i mu‘accele ve yevmî bir buçuk akçe icâre-i müeccele ile cânib-i vakıfdan iştirâk-ı sâbık üzere zevcem müvekkilem mersûme Sima Nasrâniye ile bana îcâr ve teslîm ve semeninden bâkī iki bin beş yüz guruş icâre-i mu‘accele-i mezkûre iki bin beş yüz guruşa takās ve mahsûb eyledikde ben dahi ber-vech-i muharrer asâleten ve vekâleten istîcâr ve tesellüm ve mukāssa ve kabûl edip bey‘-ı mezkûrun gabn ve tağrîrine ve icâre-i mu‘accele-i mezkûrenin adem-i istifâsına müte‘allika âmme-i da‘vâdan asâleten ve vekâleten cânib-i vakfı ve zimmet-i mütevellîyi ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb ü imlâ olundu. Fî 12 Rebî‘ülâhir sene 1184. Şuhûdu’l-hâl: Mehmed Ağa b. Ahmed vekîl-i kethudâ-yı muhzırân, Ali Çelebi b. Abdullah, Molla İsmail b. Ali, Araboğlu Mehmed Çelebi, Baltacı el-Hâc Mustafa, Papa Kirkor v. Sekyas, Papa Kalos v. Bedros, Papa Haçador v. Bogos.