İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 122 Hüküm no: 78 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müderris Abdülbaki Efendi’nin vakıf arsa üzerindeki mülk menzilini karısı Münevvere Hatun‘a sattığı Mahmiye-i İslambol’da Murad Paşa-yı atîk mahallesinde sâkin müderrisîn-i kirâm-ı zevi’l-ihtirâmdan Abdülbaki Efendi b. Mehmed tarafından husûs-ı âti’l-beyânda vekîl olduğu Abdurrahman b. Halil ve Osman b. Mehmed şehâdetleriyle sâbit olan el-Hâc Mustafa b. Veliyüddin meclis-i şer‘-i şerîf-i enverde müvekkil-i mûmâ-ileyhin zevce-i menkûhası fahrü’l-muhadderât işbu sahibetü’l-kitâb Münevvere Hatun bt. Abdullah mahzarında bi’l-vekâle ikrâr ve takrîr-i kelâm edip arsası Murad Paşa Vakfı’ndan senevî üç yüz akçe mukāta‘a-i kadîme ile tasarrufunda ve ebniyesi bâ-hüccet-i şer‘iye müvekkilim mûmâ-ileyh Abdülbaki Efendi’nin yedinde mülkü olup mahalle-i mezbûrede vâki‘ bir tarafdan makābir-i Müslimîn ve bir tarafdan ba‘zen câmi‘-i şerîf havlusu ve ba‘zen Murad Paşa Vakfı’ndan müvekkil-i mûmâ-ileyh tasarrufunda olan arsa ve ba‘zen kenîfler duvarı ve bir tarafdan ba‘zen Fâtıma Hatun ve ba‘zen Gürcü İsmail ve ba‘zen Kalaycı İsmail ve ba‘zen Rukiye Hatun ve ba‘zen el-Hâc İbrahim menzilleri ve bir tarafdan tarîk-i âm ile mahdûd dâhiliyede tabaka-i ulyâda iki bâb oda ve bir sofa ve dehliz ve kenîf ve vüstâda iki bâb oda ve bir sofa ve dehliz ve kârgir ocak ve kenîf ve âbdesthâne ve süflâda iki bâb selâmlık odası ve ahır ve kenîf ve dâhiliye cânibinde matbah ve hamam ve câmekân ve bi’r-i mâ ve eşcâr-ı müsmire ve gayr-ı müsmireli bahçeyi müştemil menzilin ebniye-i memlûkesini tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile zevcesi merkūme Münevvere Hatun’a iki bin beş yüz guruşa bey‘ ve temlîk ve teslîm ve arsasını dahi bâ-ma‘rifet-i mütevellî meccânen ferâğ u tefvîz ve semen-i mezkûru min-ciheti’l-karz zevcesi merkūmeye zimmetinde lâzımü’l-edâ deyni olan iki bin beş yüz guruşa takās ve mahsûb eyledikde ol dahi ber-vech-i muharrer iştirâ ve temellük ve tesellüm ve kabûl edip bey‘-ı mezkûrun tağrîr ve gabnine ve istifâ-i semene müte‘allika âmme-i da‘vâdan zevcesi merkūme Münevvere Hatun’un zimmetini ibrâ-i âmm-ı sahîh-i şer‘î ile ibrâ ve ıskāt edip ol dahi ibrâyı kabûl etmeğin fîmâ-ba‘d ebniye-i menzil-i mahdûd-ı mezkûr cemî‘ müştemilât-ı mezkûresiyle zevce-i merkūme Münevvere Hatun’un mülk-i müşterâsı ve hakk-ı sırfı ve arsası dahi dâhil-i havza-i tasarrufu olup müvekkilim mûmâ-ileyh Abdülbaki Efendi’nin kat‘a alâka ve medhali kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 Rebî‘ülâhir sene 1184. Şuhûdu’l-hâl: Abdurrahman b. Halil, Osman b. Mehmed.