İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 123 Hüküm no: 79 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Praşkova ve Hristo’nun kiraladıkları vakıf bostanın kira ücretine zam yapıldığı Mahmiye-i İslambol’da Kiçi Hatun mahallesinde vâki‘ ashâb-ı hayrâtdan merhûm Kasım Ağa Çeşmesi Evkāfı’ndan zikri âtî bostanın müşâhereten müste’cirleri Praşkova v. Mihal ve Hristo v. Kanoş nâm zimmîler meclis-i şer‘-i şerîf-i enverde vakf-ı mezkûrun ber-vech-i meşrûta mütevelliyesi mu‘arrefetü’z-zât işbu bâ‘isetü’l-kitâb Âişe Hanım bt. İbrahim Efendi mahzarında herbiri ikrâr ve takrîr-i kelâm edip vakf-ı mezbûrdan olup mahmiye-i mezbûre hısnı ebvâbından Silivrikapısı hâricinde Yedikule cânibinde vâki‘ beyne’l-ahâlî ma‘lûmü’l-hudûd ve’l-müştemilât bir bâb bostan senevî on yedi bin akçe icâreyle tasarrufumuzda olup lâkin mütevelliye-i [31a] mezbûre Âişe Hanım icâre-i mezkûre bostan-ı mezkûrun ecr-i mislinden noksan-ı fâhiş olmağla ecr-i misliyle kabûl eyleyin ve illâ âhara îcâr ederim deyü da‘vâ biz dahi icâre-i mezkûre ecr-i misline müsâvîdir deyip bu vechile beynimizde nizâ‘ vâki‘ olmuşidi el-hâletü hâzihî mütevelliye-i mezbûre Âişe Hanım bostan-ı mezkûrun senevî icâre-i kadîmesi olan on yedi bin akçe üzerine iki bin dört yüz akçe dahi zam ve ziyâde ve re’s-i sene Muharrem gurresi olmak üzere beher sene on dokuz bin dört yüz akçe ücret-i müsemmâ ile bi’t-tevliye müceddeden bize îcâr ve teslîm biz dahi ber-vech-i muharrer istîcâr ve kabûl ve icâre-i mezkûr on dokuz bin dört yüz akçeyi beher sene tamamında taraf-ı vakıfdan mütevelliye-i mezbûre Âişe Hanım’a teslîm ve edâya ve mu‘tâd olduğu üzere bostan-ı mezkûrun iktizâ eden cüz’î ta‘mîrâtını biz kendi mâlımızdan teberru‘an li’l-vakf ta‘mîr edip nesne mutâlebe etmemek üzere ta‘ahhüd eylediğimizde mütevelliye-i mezkûre Âişe Hanım dahi küllî ta‘mîrâtın ve müceddeden binâsın taraf-ı vakıfdan binâ edip bizden mutâlebe etmemek üzere ta‘ahhüd eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 19 Rebî‘ülâhir sene 1184. Şuhûdu’l-hâl: Yorganî Mustafa Ağa b. İbrahim, es-Seyyid İsmail b. İbrahim, Başçukadâr Mustaa b. Hüseyin, Molla Mustafa b. Osman, İmâm-ı mahalle Feyzullah Efendi b. el-Hâc Mustafa Efendi, Bağçevânlar Kethudâsı Hasan Ağa b. Osman, Molla İsmail b. Mehmed, Osman b. Ömer, Mehmed Ağa b. Mehmed, es-Seyyid Mehmed Çelebi b. Ahmed câbî-i vakf.