İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 128 Hüküm no: 84 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Destereciler Çarşısı’ndaki Kuşbazlar Fırını ile Parmakkapı’daki diğer iki fırın ve onlara bağlı değirmen gediğinin dörtte bir hissesinin Ekmekçi Dimitri’nin mülkü olduğunun şahitlerle ispat olunduğu Mahmiye-i İslambol’da Destereciler sûkunda vâki‘ Kuşbazlar Fırını demekle ma‘rûf bir bâb kebîr ekmekçi fırını ve karşısında Parmakkapı ittisâlinde vâki‘ fırın-ı mezkûra merbût bir bâb sagīr ekmekçi fırını ile zikrolunan kebîr fırın ittisâlinde kâin iki çarhlı ve dört horoslu değirmen derûnunda mevcûde gedik ta‘bîr olunur ber-mûceb-i defter-i [32b] müfredât eşyâ-i ma‘lûme ve bi’l-cümle sâir âlât-ı lâzımenin nısf-ı şâyi‘leri bundan akdem vefât eden kapan tüccârından el-Hâc Memiş b. Mustafa nâm kimesnenin yedinde mülkü olup ba‘de vefâtihî verese-i münhasırası nısf hisse-i mezkûreyi bâ-hüccet-i şer‘iye Molla Mustafa b. Ali nâm kimesneye bin dokuz yüz yirmi beş guruşa bey‘ ve temlîk ve teslîm ol dahi iştirâ ve temellük ve tesellüm eyledikden sonra mezbûr Molla Mustafa dahi zikrolunan fırınlar ile değirmen derûnunda mevcûde bargirler ve bi’l-cümle sâir eşyâ-i ma‘lûme ve âlât-ı lâzımeden mâlik olduğu nısf hisse-i şâyi‘asının nısfını bin yüz seksen iki senesi Zilka‘desi’nin yirminci günü bey‘-ı kat‘î ve safka-i vâhide ile işbu bâ‘isü’r-rakīm Ekmekçi Dimitri v. Karaca zimmîye bin iki yüz guruş semen-i medfû‘ ve makbûza bey‘ ve temlîk ol dahi iştirâ ve temellük edip ol vechile zikrolunan fırınlar ve değirmenin gedik ta‘bîr olunan bargirler ile bi’l-cümle sâir âlât-ı lâzıme-i ma‘lûmenin rub‘-ı şâyi‘leri mersûm Dimitri husûs-ı mezkûra vukūfu olanlardan istihbâr ve kıbel-i şer‘den yedine vesîka i‘tâ olunmasını iltimâs eyledikde habbâz tâifesinden Balat-ı cedîd Fırını Ustası Molla Ahmed b. Şahin ve Nişancı-ı cedîd Fırını Ustası Ahmed b. Mehmed ve Ayvansaray dâhilinde vâki‘ ekmekçi fırını ustası Osman b. Nezir ve Ebûbekir b. Mustafa nâm kimesneler li-ecli’l-ihbâr meclis-i şer‘a hâzırûn olup istihbâr olunduklarında fi’l-hakīka sâlifü’l-beyân ekmekçi fırınları ile zikrolunan değirmen derûnunda mevcûde gedik ta‘bîr olunur otuz dört re’s bargir ve bi’l-cümle sâir eşyâ-i ma‘lûme ve âlât-ı lâzımenin nısf-ı şâyi‘lerinin mâliki el-Hâc Memiş b. Mustafa’nın verese-i münhasırası nısf hisse-i mezkûreyi bâ-hüccet-i şer‘iye Molla Mustafa b. Ali nâm kimesneye bin dokuz yüz yirmi beş guruşa bey‘ ve temlîk ve teslîm ol dahi ba‘de’l-iştirâ ve’t-tesellüm mezbûr Mustafa mârrü’z-zikr fırınlar ile değirmen-i mezkûr derûnunda mevcûde bargirler ve bi’l-cümle sâir eşyâ-i ma‘lûme ve âlât-ı lâzımeden mâlik olduğu nısf hisse-i şâyi‘asının nısflarını bin yüz seksen iki senesi Zilka‘desi’nin yirminci günü bey‘-ı kat‘î ve safka-i vâhide ile işbu müstahbir-i mezbûr Ekmekçi Dimitri zimmîye bir kıt‘a hüccceti mantûkunca bin iki yüz guruş semen-i medfû‘ ve makbûza bey‘ ve temlîk ol dahi iştirâ ve temellük edip ol vechile zikrolunan fırınlar ve değirmenin gedikleri ta‘bîr olunan bargirler ile bi’l-cümle sâir eşyâ ve âlât-ı lâzıme-i ma‘lûmenin rub‘-ı şâyi‘leri târih-i mezkûrdan beri mersûm Dimitri zimmînin mülk-i müşterâsı ve hakk-ı sırfı olmuşdur bizim bu husûs bu vech üzere ma‘lûmumuzdur deyü herbiri alâ-tarîkı’ş-şehâde haber verdiklerinden sonra mersûm Dimitri zimmî şurût-ı nizâmları üzere sayf ve şitâda altı aylık zahîre der-anbar edip hilâf-ı emr-i âlî ve mugāyir-i nizâm kat‘a bir türlü vaz‘ u hareket etmemek üzere ta‘ahhüd etmeğin vâki‘u’l-hâl hıfzan li’l-makāl bi’t-taleb ketb olundu. Fi’l-yevmi’s-sâbi‘ aşer min-Muharremi’l-harâm li-sene erba‘a ve semânîn ve mie ve elf. Şuhûdu’l-hâl: Ekmekçiler Kethudâsı Ali Ağa, Yiğitbaşı Molla Osman, Sofular Ustası Molla Mustafa, es-Seyyid el-Hâc Mahmud, Kanlıfırın Ustası Molla Ahmed, el-Hâc Mahmud, Salıcı Molla Osman.