İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 129 Hüküm no: 85 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Destereciler Çarşısı’ndaki Kuşbazlar Fırını ile Parmakkapı’daki diğer iki fırın ve onlara bağlı değirmen gediğinin dörtte iki hissesinin Receb Beşe’nin mülkü olduğunun şahitlerle ispat olunduğu Mahmiye-i İslambol’da Destereciler sûkunda vâki‘ Kuşbazlar Fırını demekle ma‘rûf bir bâb kebîr ekmekçi fırını ve karşı tarafında Parmakkapı ittisâlinde kâin fırın-ı mezkûra merbût bir bâb sagīr ekmekçi fırını ile zikrolunan kebîr fırın ittisâlinde vâki‘ iki çarhlı ve dört horoslu değirmen derûnunda mevcûde gedik ta‘bîr olunur otuz dört re’s bargir ve sâir ber-mûceb-i defter-i müfredât eşyâ-i ma‘lûme ve bi’l-cümle âlât-ı lâzıme Kapan-ı dakīk tüccârından el-Hâc Memiş b. Mustafa nâm kimesnenin bâ-hüccet-i şer‘iye müstakillen yedinde mülkü olduğu hâlde fevt oldukda fırın-ı mezkûrda şerîki olan işbu bâ‘isü’l-kitâb Receb Beşe b. Mustafa nâm kimesne zikrolunan fırınlar ve değirmen derûnunda mevcûde bargirler ve bi’l-cümle sâir eşyâ-i ma‘lûme ve âlât-ı lâzımenin nısf-ı şâyi‘lerini mezbûr el-Hâc Memiş Ağa hayatında bin yüz seksen iki senesi Rebî‘ülevveli’nin gurresinden bir buçuk sene mukaddem kendiden istidâne ve kabz eylediği iki bin beş yüz elli iki buçuk guruş deyni mukābelesinde şuhûd mahzarında bey‘-ı kat‘î ve safka-i vâhide ile kendiye bey‘ ve temlîk eylediğini huzûr-ı hâkimü’ş-şer‘de hasm-ı câhid-i şer‘î muvâcehesinde şuhûd-ı udûlle ba‘de’l-isbât kıbel-i şer‘den yedine bir kıt‘a hücceti verildiğini mezbûr Receb Beşe meclis-i şer‘e gelip inhâ ve takrîr ve mazmûnu min-külli’l-vücûh takrîrine mutâbık mufassal ve meşrûh bir kıt‘a [hüccet-i] şer‘iye ibrâzıyla husûs-ı mezkûra vukūf-ı tâmmı olan bî-garaz Müslimînden istihbâr olunmasını iltimâs eyledikde habbâz tâifesinden olup Balat-ı cedîd Fırını Ustası Molla Ahmed b. Şahin ve Nişâncı-ı cedîd Fırını Ustası Ahmed b. Mehmed ve Ayvansaray dâhilinde vâki‘ ekmekçi fırını ustası Osman b. Nezir ve Ebûbekir b. Mustafa nâm kimesneler li-ecli’l-ihbâr meclis-i şer‘a hâzırûn olup istihbâr olunduklarında fi’l-hakīka sâlifü’l-beyân iki bâb ekmekçi fırını ile zikrolunan değirmen derûnunda mevcûde beyne’l-hiref gedik ta‘bîr olunur otuzdört re’s bargir ve bi’l-cümle sâir eşyâ-i ma‘lûme ve âlât-ı lâzıme kapan tüccârından el-Hâc Memiş b. Mustafa nâm kimesnenin bâ-hüccet-i şer‘iye müstakillen yedinde mülkü olduğu hâlde fevt oldukda müstahbir-i mezbûr Receb Beşe zikrolunan fırınlar ve değirmen derûnunda mevcûde bargirler ve bi’l-cümle sâir eşyâ-i ma‘lûme ve âlât-ı lâzımenin nısf-ı şâyi‘lerini mezbûr el-Hâc Memiş Ağa hayatında bin yüz seksen iki senesi Rebî‘ülevveli gurresinde bir buçuk sene mukaddem kendiden ber-mûceb-i temessük istidâne ve kabz eylediği iki bin beş yüz elli iki buçuk guruş deyni mukābelesinde şuhûd mahzarında bey‘-ı kat‘î ve safka-i vâhide ile kendiye bey‘ ve teslîm eylediğini huzûr-ı hâkimde hasm-ı câhid-i şer‘î muvâcehesinde şuhûd-ı udûlle isbât edip kıbel-i şer‘den yedine bir kıt‘a [33a] hüccet-i şer‘iye i‘tâ olunmağın ol vechile zikrolunan fırınlar ile değirmen derûnunda mevcûde bargirler ve bi’l-cümle sâir eşyâ-i ma‘lûme ve âlât-ı lâzımenin nısf-ı şâyi‘leri müstahbir-i mezbûr Receb Beşe’nin mülk-i mahzı ve hakk-ı sarîhidir bizim bu husûs bu vech üzere ma‘lûmumuzdur deyü herbiri alâ-tarîkı’ş-şehâde haber verdiklerinden sonra mezbûr Receb Beşe şurût-ı nizâmları üzere sayf ve şitâda altı aylık zahîre der-anbar edip hilâf-ı fermân-ı âlî ve mugāyir-i nizâm kat‘a bir türlü vaz‘ u hareket etmemek üzere ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Muharremi’l-harâm li-sene erba‘a ve semânîn ve mie ve elf. Şuhûdu’l-hâl: Şâhidûnü’s-sâbıkūn.