İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 131 Hüküm no: 87 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Ekmekçiler Kethudâsı Hacı Abdullah’ın ticarî ortaklığa son verip zimmetini ibra ettikten sonra değirmen gediğini eski ortağına kiraya verdiği Mahmiye-i İslambol’da Hoca Halil Attar mahallesinde sâkin sâbıkā Ekmekçiler Kethudâsı el-Hâc Abdullah b. Mehmed nâm kimesne meclis-i şer‘-i şerîf-i enverde şerîki işbu bâ‘isü’r-rakīm Agop v. Serkiz nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Samatyakapısı hâricinde vâki‘ beyne’l-ahâlî ma‘lûmü’l-hudûd üç horoslu değirmen derûnunda mevcûde on iki re’s bargirler ile sâir ber-mûceb-i defter âlât-ı lâzımenin nısfları benim ve nısf-ı âharları mersûm Agop zimmînin şâyi‘an yedimizde mülk ve hakkımız olup ve târih-i kitâba gelince beş sene mikdârı mersûm [Agop v.] Serkiz zimmî ile fâide beynimizde münâsafet olmak üzere şerîkler olup ticâret etmişidik el-hâletü hâzihî mersûm Agop zimmî ile fesh-i akd-i şirket edip zeyl-i vesîkada mektûbü’l-esâmî ustalar ma‘rifetleriyle hesâb-ı sahîh ile hesâbımız görülüp herbirimizin âhar zimmetinde ve kıbelinde bir akçe ve bir habbe alacak hakımız zuhûr etmemekle ben re’s-i mâlım olan iki yüz guruş sermâyemi dahi ahz u istifâ eylediğimden sonra husûs-ı şirkete ve bi’l-cümle târih-i kitâba gelince beynimizde cereyân eden ahz u i‘tâya müte‘allika âmme-i da‘vâdan herbirimiz âharın zimmetini şurût-ı müfside ve muvâza‘adan ârî ibrâ-i âmm-ı sahîh-i şer‘î ile ibrâ ve ıskāt ve herbirimiz âharın ibrâsını ba‘de’l-kabûl ben sâlifü’z-zikr değirmen derûnunda mevcûd mâlik olduğum altı re’s bargirimi âlât-ı lâzımeleriyle herbirini yevmiye dörder akçe hesâbı üzere târih-i kitâbdan beher şehr altışar guruşdan iki sene tamamına değin yüz kırk dört guruşa mersûm Agop zimmîye îcâr ve teslîm eylediğimde ol dahi ber-vech-i muharrer istîcâr ve kabûl ve ücret-i mezkûre altışar guruşu beher şehr hitâmında mezbûr Agop zimmî bilâ-nizâ‘ bana teslîm ve edâya ta‘ahhüd eyledikde ben dahi râzı olup nizâ‘ ve muhâlefet etmemek üzere ta‘ahhüd eyledim dedikde mersûm Agop zimmî dahi mukırr-ı mezbûr el-Hâc Abdullah’ı bi’l-cümle kelimât-ı meşrûhasında vicâhen ve şifâhen tahkīk ve tasdîk etmeğin mâ-vaka‘a bi’t-taleb ketb ü imlâ olundu. Fî 5 min-Rebî‘ülevvel sene [1]184. Şuhûdu’l-hâl: Uncular Kethudâsı Mustafa b. Ahmed, Ahmed Usta b. Mehmed, Kanlıfırın Ustası Ahmed Ağa.