İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 132 Hüküm no: 88 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafîze bt. Mehmed’in bazı eşyasını annesi Fatma’ya satıp bazı mücevherini de hîbe ettiği Mahmiye-i İslambol’da Sultân Selim civârında Tevkī‘î Cafer mahallesinde Leblebici odalarında sâkine zâtı ta‘rîf-i şer‘î ile mu‘arrefe olan Hafîze bt. Mehmed nâm hatun meclis-i şer‘-i şerîf-i enverde kezâlik zâtı mu‘arrefe olan vâlidesi işbu bâ‘isetü’l-kitâb Fâtıma bt. Ali nâm hatun mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olan altı şayka yasdık ve üç minder ve iki baş yasdığı ve iki şayka mak‘ad ve üç yemenî yorgan ve Şam alacası üç anteri ve şâla kaplı bir kakum kürk ve bir kıt‘a cübbe ve üç tencere, beş sahan ve iki sagīr sini ve bir leğen ma‘a ibrik ve bir âbdest leğeni ve iki şam‘dânımı tarafeynden îcâb ve kabûlü hâvî bey‘-ı bâtt-ı sahîh-i şer‘î ve safka-i vâhide ile vâlidem mezbûre Fâtıma Hatun’a elli guruşa bey‘ ve temlîk ve teslîm ve yine eşyâ-i memlûkemden onar miskāl bir çift altın bilezik ve bir çift altın kuşak ile bir çift zümrüd habbe küpemi dahi vâlidem merkūma hîbe-i sahîha-i şer‘iye ile hîbe ve temlîk ve teslîm eylediğimde ol dahi ber-vech-i muharrer iştirâ ve temellük ve ittihâb ve tesellüm ve kabûl eyledikden sonra semeni olan meblağ-ı mezbûr elli guruş mutâlebesine müte‘allika âmme-i da‘vâdan vâlidem mezbûrenin zimmetini ibrâ-i âm ile ibrâ ve ıskāt eyledim fîmâ-ba‘d eşyâ-i muharrere-i mezkûre-i mütenevvi‘a vâlidem mezbûre Fâtıma Hatun’un mülk-i müşterâsı ve mal-ı mevhûbu olup benim kat‘a alâka ve medhalim kalmamışdır keyfe mâ teşâ ve tahtâr mutasarrıfe olsun dedikde ol dahi mukırre-i mezbûreyi kelimât-ı meşrûhasında vicâhen ve şifâhen tahkīk ve tasdîk etmeğin mâ-vaka‘a bi’t-taleb ketb olundu. Fî-gurret-i Ca sene 1184. Şuhûdu’l-hâl: Ali Çelebi b. Abdullah, Mustafa Ağa b. Mehmed, Molla Mustafa b. Ahmed, İmâmeci el-Hâc Mustafa.