İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 139 Hüküm no: 94 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Doksi bt. Yorgo’nun aynı evde yaşarken anlaşamadıkları için ayrıldıkları kızının alacak verecek hususunda zimmetini ibra ettiği Mahmiye-i İslambol’da Lanka kurbünde Mercimek mahallesinde mütemekkine ve şahsı ta‘rîf-i şer‘î ile mu‘arrefe olan Doksi bt. Yorgo nâm Nasrâniye meclis-i şer‘-i şerîf-i enverde sadriye kebîre kızı işbu bâ‘isetü’r-rakīm Despino bt. Anaştaş nâm Nasrâniye’nin zevci ve tarafından vech-i âtî üzere vekîl olduğu şahsını ârifân Üskülü v. Ayağyos ve Yuvan v. Tanaş nâm zimmîler şehâdetleriyle sâbit olan diğer Yuvan v. Kiryako nâm zimmî muvâcehesinde ikrâr-ı tâm ve takrîr-i kelâm edip kızım müvekkile-i mersûme Despino Nasrâniye ile bir menzilde ma‘an sâkine iken beynimiz[de] şikāk vukū‘una binâen bu esnâda müfârakat ve ben âhar menzile nakledip kızım mersûmenin menzilinde olan eşyâmı mutâlebe için arzuhâl ile da‘vâya tesâddî etmişidim el-hâletü hâzihî bâ-tavassut-ı muslihîn kızım mersûme Despino Nasrâniye menzilinde olup benim mâlım olan bir telli üsküfe anteri ve bir kürk kabı ve altı döşek çârşebi ve iki işleme yorgan yüzü ve üç işleme baş yasdığı ve altı işleme yüz yasdığı ve bir yemenî yorgan yüzü ve altı işleme boğça ve altı yüz peşkiri ve beş kat çamaşur ve üç yemenî mak‘ad ve bir işleme yağlık ve otuz guruş kıymetli bir elmas yüzük ve on altınlık bir Macar altını ve iki oda döşemesi ve otuz vakıyye bakır evânîsi ve sâir ber-mûceb-i defter eşyâ-i ma‘lûmemi bi-a‘yânihâ bana def‘ u teslîm eyledikde ben dahi yedinden ahz u kabz edip eşyâ-i muharrere-i mezkûremden kızım müvekkile-i mersûme Despino Nasrâniye yedinde ve menzilinde bir nesne bâkī kalmamağla kızım müvekkile-i mersûme Despino Nasrâniye’den bi-şarti’r-rücû‘ emriyle masrûfum olup matlûbum olan iki yüz guruş ve menzil husûsu için masrûfum olan iki yüz yetmiş beş guruş ki cem‘an dört yüz yetmiş beş guruş ve târih-i kitâba gelince beynimizde cereyân eden ahz u i‘tâya ve mu‘âmelât-ı şettâya ve bi’l-cümle sâir ma‘lûm ve mechûl hukūk-ı şer‘iyeye müte‘allika âmme-i de‘âvî ve kâffe-i mutâlebâtdan ben kızım müvekkile-i mersûme Despino Nasrâniye’nin zimmetini ol dahi kezâlik benim zimmetimi şürût-ı müfside ve muvâza‘adan ârî ibrâ-i âmm-ı sahîh-i şer‘î ile ibrâ ve ıskāt edip ve herbirimiz âharın ibrâsını kabûl eyledik min-ba‘d biribirimiz ile asla ve kat‘a da‘vâ ve nizâ‘ ve husûmetimiz kalmamışdır dedikde vekîl-i [37a] mersûm diğer Yuvan zimmî dahi kayınanası mukırre-i mersûme Doksi Nasrâniyeyi kelimât-ı meşrûhasında vicâhen ve şifâhen tahkīk ve tasdîk ve bi’l-vekâle ibrâsını kabûl etmeğin mâ-vaka‘a bi’t-taleb ketb olundu. Fî 19 Ca sene [1]184. Şuhûdu’l-hâl: Kādızâde es-Seyyid Hasan Ağa, Halıcı Ahmed Ağa b. Mehmed, Ali Çelebi b. Abdullah, Muhzır Azizoğlu Mehmed Çelebi, el-Hâc Mustafa, Kürkcü Pavlo v. Kostantin ve Keresteci Praşkova v. Panayot, Papaz Dimitri v. Yorgi, Üskülü v. Ganosti, Şerbetci Ligori v. Yorgi.