İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 140 Hüküm no: 95 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin Efendi’nin arsası vakıf mülk menzilini sattığı Mahmiye-i İslambol’da Şirmerd Çavuş mahallesinde sâkin Mehmed Emin Efendi b. el-Hâc Ahmed Ağa meclis-i şer‘-i şerîf-i enverde vâlidesi işbu bâ‘isetü’l-kitâb Zeyneb Hatun bt. Abdullah tarafından husûs-ı âti’l-beyânı tasdîka vekîl-i şer‘îsi olan Ahmed Ağa b. Ali Efendi mahzarında ikrâr-ı tâm ve takrîr-i kelâm edip arsası mahalle-i mezbûre müezzinine senede üç yüz altmış akçe mukāta‘a-i kadîme ile tasarrufumda ve üzerinde olan ebniyesi bâ-hüccet-i şer‘iye şirâen yedimde mülküm olup mahalle-i mezbûrede vâki‘ bir tarafdan ba‘zen İmâm es-Seyyid Mustafa Efendi menzili ve ba‘zen Yazıcı Mustafa Efendi menzili ve bir tarafdan Za‘îm Ali Ağa menzili ve bir tarafdan Kethudâ Kâtibi Ali Efendi veresesi menzili ve bir tarafdan tarîk-i âm ile mahdûd fevkānî iki bâb oda ve bir camlı köşk ve tahtında kenîf ve mağsel ve matbah ve müşterek bi’r-i mâ ve havluyu müştemil menzilin ebniye-i memlûkesini tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile vâlidem müvekkile-i mersûme Zeyneb Hatun’a altı yüz guruşa bey‘ ve temlîk ve arsasını dahi bâ-re’y-i mütevellî meccânen ferâğ u tefvîz eylediğimde ol dahi ber-vech-i muharrer iştirâ ve temellük ve tesellüm eyledikden sonra semeni olan meblağ-ı mezbûr altı yüz guruşu vâlidem müvekkile-i mezbûre Zeyneb Hatun yedinden tamamen ahz u kabz edip bey‘-ı mezbûrun tağrîr ve gabnine ve istifâ-i semene müte‘allika âmme-i da‘vâdan vâlidem müvekkile-i mezbûre Zeyneb Hatun’un zimmetini ibrâ-i âm ile ibrâ ve ıskāt eyledim ba‘de’l-yevm ebniye-i menzil-i mahdûd-ı mezkûr vâlidem müvekkile-i mezbûre Zeyneb Hatun’un mülk-i müşterâsı ve arsası dâhil-i havza-i tasarruf olup benim kat‘a alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb ü imlâ olundu. Fî 21 Cumâdelûlâ sene 1184. Şuhûdu’l-hâl: Kahveci Hasan, Şehzâde Kayyûmu Osman Efendi, es-Seyyid Mehmed Emin b.Mustafa, Altuncu Mehmed Beşe, Şeyh Musa Efendi, es-Seyyid Mustafa Ağa.