İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 141 Hüküm no: 96 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun süreden beri kayıp olan Küçük Nikola’nın kapalı olan iki adet yağ mağazasında tespit edilip kayyıma teslim olunan eşyasının defteri Zikri âtî husûs için kıbel-i şer‘den mürsel Ali Efendi İslambol’da Unkapanı dâhilinde Harâccı Kara Mehmed mahallesinde vâki‘ Mehmed Emin b. Mehmed nâm sagīrin mutasarrıf olduğu iki bâb yağcı mağazalarına varıp huzûr-ı Müslimînde akdeylediği meclis-i şer‘de zikrolunan iki bâb mağazalarda müste’cir [37b] olup müddet-i vâfireden beri firâr ve gaybet-i münkatı‘a ile gāib olduğu zeyl-i defterde mastûrü’l-esâmî kimesneler ihbârlarıyla zâhir ve hayat ve memâtı ma‘lûm olmayan Küçük Nikola nâm zimmînin terk eylediği eşyâsı ile Yağ Kapanı tüccârından semen-i ma‘lûma iştirâ ve kabz eylediği revgan-ı çerviş ve revgan-ı sâde ve revgan-ı zeyt ve aselin semenleri dahi gāib-i mezbûrun hâli mütebeyyin oluncaya değin yed-i emîne vaz‘ u teslîm olunmak üzere fermân-ı âlî dahi sâdır olmağın imtisâlen-leh Bakkalân Pazarbaşısı Vekîli Eyyûbî Ali Ağa ve Bakkāl Molla Osman ve Bakkāl Molla Ahmed ve sâir mazbûtü’l-esâmî kimesneler ile sagīr-i mezbûrun vasîsi İmâm Hâfız İsmail Efendi ma‘rifetleriyle muvâcehelerinde zikrolunan iki bâb mağazalar feth ve derûnunda mevcûd olup mürûr-ı eyyâm ile telef olacağı zâhir olan yağları Müslimûn-ı merkūmûn takvîm ve herbirinin meblağı tahtlarına vaz‘ olunup ve emîn ve mu‘temed olduğu dahi kezâlik Müslimûn-ı merkūmûn ihbârlarıyla lede’ş-şer‘ zâhir olan Nikola v. Panayot ve İstapoz v. Tanaş ve Dimitri v. Yamandi ve Panayot v. Yorgo nâm zimmîler kıbel-i şer‘den kayyım nasb onlar dahi birbirlerine kefîl ve mezbûrûna yağcı tâifesinden Uzun Nikola v. Kostantin ve Yorgi v. İstemat ve Yani v. Dimitri ve diğer Yani v. Dimitri nâm zimmîler dahi tekeffül eylediklerinden sonra telef ihtimâli olmayan eşyânın aynıları telef ihtimâli olan eşyâ-i mezkûreyi kayyım-ı merkūmûn ber-minvâl-i muharrer âhara bey‘ ve semenlerinden hâsıl olan meblağ gāib-i mezbûrun hâli mütebeyyin oluncaya değin hıfz için beher haftada tüccâr-ı merkūmûnun taraflarından emîn ve mu‘temed ve muhtârları olan Yağ Kapanı Hancısı el-Hâc Mustafa Ağa b. Osman nâm kimesneye teslîm etmek üzere terâzî eylediklerini kâtib-i merkūm mahâllinde tahrîr eylediği eşyâ-i mezkûre defteridir ki ber-vech-i âtî zikrolunur. Fi’l-yevmi’l-işrîn min-Cumâdelûlâ li-sene erba‘a ve semânîn ve mie ve elf. #&# Revgan-ı çerviş 179 kıyye, fî 78 Kıymet 13.962 Def‘a revgan-ı çerviş 256,5 kıyye, fî 78 Kıymet 20.007 Def‘a revgan-ı çerviş 25 kıyye, fî 78 Kıymet 1.950 Kuşadası balı 47 kıyye, fî 21 Kıymet 987 Tortulu zeytun yağı 30 kıyye, fî 27 Kıymet 810 Revgan-ı çerviş tortusu 40 kıyye, fî 30 Kıymet 1.200 Potunada çerviş 6 kıyye, fî 78 Kıymet 468 Zeytünyağı 28 kıyye, fî 78 Kıymet 2.184 Def‘a tortusu 16 kıyye, fî 78 Kıymet 1.263 Def‘a tortu 690 kıyye Def‘a zeytunyağı 24 kıyye, fî 45 Kıymet 1.080 Def‘a asel Kıymet 120 Hatab 5 çeki Kıymet 600 Çil akçe 100 aded Yekûn Kıymet 46.726 Tüysüz Panayot v. Yorgo zimmînin gāib-i mezbûra ikrâr ve i‘tirâfıyla deyni 116 guruş, meblağ; 13.920 akçe Cem‘an yekûn: 60.646 [38a] Puşi plavta? 4 aded Yağ demiri 8 aded Minder 3 aded Kilim 11 aded Irak tamakı? sandık 1 aded Sagīr boş desti 1 aded Çekmece 1 aded Boş sandık 3 aded Yasdık 4 aded Köhne kebe 2 aded Çatal çekiç 1 aded Sagīr çekiç 1 aded Evânî-i nuhâsiye 62 kıyye Köhne balta 1 aded Vezne 3 aded Bıçak 1 aded Boş kebîr fıçı 11 aded Potuna 5 aded Sagīr ve kebîr kantar 4 aded Saç ayak 1 aded Mermer havan 1 aded Boş zeytun yağı tulumu 11 aded Sagīr sîm kuşak 1 çift Köhne yemenî 1 aded Yağlık 4 aded Köhne kuşak 1 aded Şerit 1 aded Nimten 1 aded Sîm yüzük 2 aded Defterler 3 aded Sîm zincir kıt‘a 1 aded Sebîke altın Direm 1,5 aded Barata 1 aded Şuhûdu’l-hâl: Bakkalân Pazarbaşısı Eyyûbî Ali Ağa, Bakkāl Molla Osman, Bakkāl Molla Ahmed, el-Hâc Mustafa b. Hasan.