İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 143 Hüküm no: 97 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Bakkal Yorgi’den intikal eden bakkal dükkânını aralarında eşit şekilde işletmeye çocuklarının söz verdikleri Bakkāl Bakkāl tâifesinden olup mahmiye-i İslambol’da Arabacı Bâyezid mahallesinde vâki‘ Ağazâde Dükkânı demekle ma‘rûf dükkânda bakkāl olan Panayot nâm zimmî kendi nefsinden asîl ve li-ebeveyn karındaşı Yorgaki nâm zimmî tarafından husûs-ı âti’l-beyânı ikrâra vekîl olduğu Dimo v. Kolo ve diğer Dimo v. Yani nâm zimmîler şehâdetleriyle sâbit olmağla mersûm Panayot zimmî meclis-i şer‘-i şerîf-i enverde âhar li-ebeveyn karındaşı işbu bâ‘isü’r-rakīm Yani nâm zimmî muvâcehesinde bi’l-asâle ve bi’l-vekâle takrîr-i kelâm ve bast-ı merâm edip sâlifü’z-zikr bakkāl dükkânının derûnunda mevcûd beyne’l-hiref gedik ta‘bîr olunur âlât-ı lâzıme-i ma‘lûme yüz yirmi sehim i‘tibârıyla altmış sehmi babamız olup mukaddemâ hâlik olan Bakkāl Yorgi v. Dimo nâm zimmînin hayatında yedinde mülk ve hakkı olup ba‘de helâkihî verâseti zevcesi anamız Despino bt. Dimo nâm Nasrâniye ile karındaşlarım mezbûrân Yorgaki ve Yani zimmîlere ve bana ve iki nefer kız karındaşlarımıza münhasıra ve kız karındaşlarımız mezbûretân hisselerini babamız hâlik-i mersûmun tereke-i uhrâsından istifâ ve anamız mersûme dahi hisse mutâlebe etmemekle ol vechile zikrolunan bakkāl dükkânının i‘tibâr-ı mezkûr ile altmış sehmi babamız hâlik-i mersûmdan müntakil karındaşlarım mezbûrân Yorgaki ve Yani zimmîler ile benim herbirimizin yirmişer sehim şâyi‘an yedimizde mülk-i mevrûsumuz olup eğer anam mezbûre Despino Nasrâniye âlât-ı mezkûrede hisse mutâlebe ederse kendiyi irzâ etmeğe ta‘ahhüd edip âlât-ı mezkûreden ber-mûceb-i i‘tibâr-ı mezkûr altmış sehimden herbirimiz yirmişer sehim hisseye ırsen mâlikler olup herbirimizin hissesine ta‘arruz ve müdâhale etmeyip vech-i meşrûh üzere âlât-ı mezkûreden altmış sehmi herbirimiz yirmişer sehim i‘tibârıyla istimâl etmek üzere beynimizde ahd ü mîsâk ve kavl ü ittifâk eyledik dedikde mersûm Yani dahi karındaşı mukırr-ı mersûm Panayot zimmîyi kelimât-ı meşrûhasında vicâhen ve şifâhen tahkīk ve tasdîk etmeğin vâki‘u’l-hâl hıfzan li’l-makāl bi’t-taleb ketb olundu. Fî 20 Ca sene 1184. Şuhûdu’l-hâl: Muhzırlar Kethudâsı Mehmed Ağa b. Ahmed, Ali Çelebi, Molla İsmail, Dimo v. Yani, Yani v. Nikola.