İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 144 Hüküm no: 98 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yorgi’den intikal eden bakkal dükkânını aralarında eşit şekilde işletmeye oğlu Yani’nin söz verdiği Bakkāl Bakkāl tâifesinden olup mahmiye-i İslambol’da Arabacı Bâyezid mahallesinde vâki‘ Ağazâde Dükkânı demekle ma‘rûf dükkânda bakkāl olan Yani nâm zimmî meclis-i şer‘-i şerîf-i enverde li-ebeveyn karındaşları işbu bâ‘iseyi’r-rakīm Panayot nâm zimmî kendi nefsinden asîl ve li-ebeyevn karındaşı Yorgaki nâm zimmî tarafından husûs-ı âti’l-beyânı tasdîka vekîl olduğu Dimo v. Kolo ve diğer Dimo v. Yani nâm zimmîler şehâdetleriyle sâbit olmağla mersûm Panayot zimmî muvâcehesinde takrîr-i kelâm ve bast-ı merâm edip sâlifü’z-zikr bakkāl dükkânının derûnunda mevcûde beyne’l-hiref gedik ta‘bîr olunur âlât-ı lâzıme-i ma‘lûmenin yüz yirmi sehim i‘tibârıyla altmış sehmi babamız olup mukaddemâ hâlik olan Bakkāl Yorgi v. Dimo nâm zimmînin hayatında yedinde mülk ve hakkı olup ba‘de helâkihî verâseti zevcesi anamız Despino bt. Dimo Nasrâniye ile karındaşlarım mezbûrân Panayot ve Yorgaki zimmîler ve iki nefer kız karındaşlarımıza münhasıra ve kız karındaşlarımız mezbûretân hisselerini babamız hâlik-i mersûmun tereke-i uhrâsından istifâ ve anamız mersûme dahi hisse mutâlebe etmemekle ol vechile zikrolunan bakkāl dükkânının i‘tibâr-ı mezkûr ile altmış sehmi babamız hâlik-i mersûmdan müntakil karındaşlarım mezbûrân Panayot ve Yorgaki zimmîler ile benim herbirimizin yirmişer sehim şâyi‘an yedimizde mülk-i mevrûsumuz olup eğer anam mezbûre Despino Nasrâniye âlât-ı mezkûreden hisse mutâlebe ederse kendiyi irzâ etmeğe taahhhüd edip âlât-ı mezkûreden ber-mûceb-i i‘tibâr-ı mezkûr altmış sehimden herbirimiz yirmişer sehim hisseye ırsen mâlikler olup herbirimiz âharın hissesine ta‘arruz ve müdâhale etmeyip vech-i meşrûh üzere âlât-ı mezkûreden altmış sehmi herbirimiz yirmişer sehim hisse i‘tibârıyla istimâl etmek üzere beynimizde ahd ü mîsâk ve kavl ü ittifâk eyledik dedikde mersûm Panayot zimmî dahi karındaşı mukırr-ı mersûm Yani zimmîyi bi’l-asâle ve bi’l-vekâle kelimât-ı meşrûhasında vicâhen ve şifâhen tahkīk ve tasdîk etmeğin vâki‘u’l-hâl hıfzan li’l-makāl bi’t-taleb ketb olundu. Fî 20 Ca sene [1]184. Şuhûdu’l-hâl: Muhzır Kethudâsı Mehmed Ağa b. Ahmed, Ali Çelebi, Molla İsmail, Dimo v. Yani, Yani v. Nikola, Yorgi v. Nikola.