İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 145 Hüküm no: 99 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Esad ve kız kardeşinin tasarruflarında olan vakıf menzilin bedeli karşılığında başkasına devri için vasîlerine izin verildiği Mahmiye-i İslambol’da Sultân Selim kurbünde Cebecibaşı mahallesinde sâkin iken bundan akdem vefât eden zikrolunan Sultân Selim Muvakkiti Mehmed Said Efendi b. el-Hâc Mehmed’in sulbî sagīr oğlu Mehmed Es‘ad ve sulbiye sagīre kızı Tayyibe’nin bâ-hüccet-i şer‘iye vasîleri bâ‘isü’l-kitâb [39a] kuzât-ı kirâmdan Mehmed Efendi b. Ali meclis-i şer‘-i şerîf-i enverde bi’l-vesâye takrîr-i kelâm ve ta‘bîr ani’l-merâm edip mahalle-i mezbûrede vâki‘ bir tarafdan Dürrîzâde Efendi bostanı ve bir tarafdan Müezzin Molla Ahmed menzili ve bir tarafdan müteveffâ-yı mezbûrun veresesi menzilleri ve bir tarafdan tarîk-i âm ile mahdûd galle ve tevliyeti mârrü’z-zikr Cebecibaşı Mescid-i şerîfinde müezzin olanlara meşrûta merhûm Şücâ‘ Bey Vakfı’ndan ma‘lûmü’l-müştemilât bir bâb menzil müteveffâ-yı mezbûrun ilâ vefâtihî bi’l-icâreteyn taht-ı tasarrufunda ve ba‘de vefâtihî vasîleri olduğum sagīrân-ı mezbûrâna intikāl-i âdî ile intikāl edip lâkin menzil-i mahdûd-ı mezkûr mürûr-ı eyyâm ile müşrif-i harâb ve hâsılı harcına ve icâre-i müeccelesine vefâ etmeyip bekāsı muzır olduğundan mâ‘adâ menzil-i mezbûr sagīrân-ı mezbûrânın mâllarıyla binâ ve ta‘mîr olunduğu sûretde sagīrân-ı mezbûrân mutazarrır olacakları zâhir olmağla menzil-i mezkûr bedel-i misli ve re’y-i mütevellî ile âhara ferâğ ve bedeli istirbâh olunup bedeli hıfz olunmak sagīrân haklarında her vechile enfa‘ ve evlâ olmağın menzil-i mezkûru bedel-i misli ve re’y-i mütevellî ile âhara ferâğa kıbel-i şer‘den bana izin verilmek bi’l-vesâye matlûbumdur dedikde hakīkat-i hâl vasîyy-i mûmâ-ileyhin takrîr-i meşrûhu üzere olduğu zeyl-i vesîkada muharrerü’l-esâmî Müslimîn ihbârlarıyla lede’ş-şer‘i’l-enver zâhir ve mütehakkık olmağın hâkim-i muvakkı‘-ı sadr-ı kitâb tûbâ lehû ve hüsnü-meâb efendi hazretleri dahi menzil-i mahdûd-ı mezkûru bedel-i misli ve re’y-i mütevellî ile âhara ferâğa izin vermeğin mâ-vaka‘a bi’t-taleb ketb olundu. Fî 26 Ca sene [1]184. Şuhûdu’l-hâl: İmâmzâde Abdülhalim Efendi b. Mehmed Efendi, Mehmed Emin Efendi [b.] el-Hâc Abdullah, Ali Efendi b. Mehmed.