İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 145 Hüküm no: 100 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüysüzzâde Hasan’ın tasarrufunda bulunan vakıf Şifa Hamamı’nı kiraya verdiği Mahmiye-i İslambol’da Hırka-i şerîf kurbünde sâkin İmâm Yakub Efendi b. Ali meclis-i şer‘-i şerîf-i enverde mahmiye-i mezbûrede Mollahüsrev mahallesinde sâkin işbu bâ‘isü’l-kitâb Tüysüzzâde el-Hâc Hasan b. el-Hâc Mustafa mahzarında ikrâr-ı tâm ve takrîr-i kelâm edip Hekîmbaşı-i esbak merhûm Mehmed Efendi Vakfı’ndan olup mahmiye-i mezbûrede Mollagürânî mahallesinde vâki‘ Şifâ Hamamı demekle ma‘rûf beyne’l-ahâlî ve’l-cîrân ma‘lûmü’l-hudûd ve’l-müştemilât bir bâb Kuşluk Hamamı bâ-temessük-i mütevellî mezbûr el-Hâc Hasan Ağa’nın vefâen tasarrufunda ve derûnunda mevcûde beyne’l-hiref [gedik] ta‘bîr olunur ber-mûceb-i defter-i müfredât bi’l-cümle esvâb ve eşyâ-i ma‘lûme yedinde mâlı olmağla mezbûr el-Hâc Hasan Ağa bundan akdem hamam-ı mezkûru beher şehr kırk beşer guruşa ve gedik ta‘bîr olunur esvâb ve eşyâ-i ma‘lûmesini beher şehr on birer guruşa bana îcâr ve teslîm ben dahi istîcâr ve kabûl etmişidim el-hâletü hâzihî mezbûr el-Hâc Hasan Ağa icâre-i mezkûrenin şehriye on altışar guruşunu bi’t-terâzî hat ve tenzîl eyledikden sonra mezbûr el-Hâc Hasan Ağa zikrolunan hamam ve gedik ta‘bîr olunur derûnunda mevcûde esvâb ve eşyâ-i ma‘lûmeyi şehr-i âtî Cumâdelâhiresi gurresinden beher şehr kırkar guruşa bana îcâr ve teslîm eyledikde ben dahi ber-vech-i muharrer istîcâr ve tesellüm ve kabûl edip icâre-i mezkûre kırkar guruşu beher şehr tamamında bilâ-nizâ‘ mezbûr el-Hâc Hasan Ağa’ya ve taraf-ı vakfa verilen icâre-i müeccele [39b] şehriye yirmişer guruş dahi kemâ-fi’l-evvel cânib-i vakfa teslîm ve edâya ta‘ahhüd eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 Ca sene [1]184. Şuhûdu’l-hâl: Mehmed Efendi b. el-Hâc Mustafa, Ömer Efendi b. Mahmud, Molla İbrahim b. Eyüb, Molla Yusuf.