İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 146 Hüküm no: 101 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’nın mülk fırın ve değirmenini Ahmed Beşe ile ortaklarına kiraya verdiği Mahmiye-i İslambol’da Cedîd Nişâncı Paşa Fırını ve ona merbût Müftü Hamamı kurbünde sekiz horoslu değirmenin gedik ashâbından Ahmed Beşe b. Mehmed nâm kimesne kendi nefsinden asîl ve şerîkleri Hasan Usta b. Abdullah ve Veli b. Nezir ve Abdülhalim b. Cafer nâm kimesneler taraflarından husûs-ı âti’l-beyândan sâbitü’l-vekâle vekîlleri olmağla mezbûr Ahmed Beşe meclis-i şer‘-i şerîf-i enverde zikrolunan değirmenin bâ-hüccet-i şer‘iye mâliki olan işbu bâ‘isü’l-kitâb Osman Ağa b. Ömer mahzarında bi’l-asâle ve bi’l-vekâle ikrâr-ı tâm ve takrîr-i kelâm edip sâlifü’l-beyân Nişâncı Paşa-yı cedîd Câmi‘-i şerîfi kurbünde vâki‘ beyne’l-ahâlî ve’l-cîrân ma‘lûmü’l-hudûd ve’l-müştemilât ekmekçi fırını ve ona merbût Müftü Hamamı kurbünde kâin lede’l-ahâlî ma‘lûmü’l-hudûd sekiz horoslu değirmende mezbûr Osman Ağa’nın bâ-hüccet-i şer‘iye yedinde mülk ve hakkı ve derûnunda ben ve müvekkillerim mezbûrûn müşâhereten müste’cirler olup lâkin mezbûr Osman Ağa zikrolunan fırın ve değirmenin şehriye kirâsı altmış guruş olup beher şehr altmış guruşu kabûl etmişidiniz deyü da‘vâ ve biz dahi kadîmî kirâsı beher şehr elli birer guruşdur deyü ziyâdeyi inkâr edip mezbûr Osman Ağa ziyâde müdde‘âsını beyân esnâsında beynimize muslihûn tavassut edip mezbûr Osman Ağa ziyâde dokuz guruşdan müddet-i ma‘lûmede müctemi‘ matlûbu olan dört yüz seksen guruş da‘vâsından meccânen fâriğ ve meblağ-ı mezbûr mutâlebesine müte‘allika âmme-i da‘vâdan benimle müvekkilûn-ı mezbûrûndan herbirimizin zimmetimizi ibrâ ve ıskāt eyledikden sonra mezbûr Osman Ağa zikrolunan fırın ve değirmeni ekmekçiler kethudâsı ve bi’l-cümle nizâm ustaları ma‘rifetleriyle şehr-i âtî Cumâdelâhiresi gurresinden beher şehr [elli] beşer guruşa benimle şerîklerim müvekkilûn-ı mezbûrûna îcâr ve teslîm eyledikde ben dahi ber-vech-i muharrer bi’l-asâle ve bi’l-vekâle istîcâr ve tesellüm ve kabûl edip icâre-i mezkûre elli beş guruşdan şerîklerim müvekkilûn-ı mezbûrûn Hasan Usta ve Nezir oğlu Veli ve Cafer oğlu Abdülhalim’in hisselerine isâbet eden meblağa dahi tarafeynden bâlâda bi’l-emr ve’l-kabûl ben kefîl ve zâmin olup ve ücret-i mezkûre elli beşer guruşu beher şehr tamamında bilâ-nizâ‘ mezbûr Osman Ağa’ya asâlet ve kefâletime binâen teslîm ve edâya ta‘ahhüd eylediğimde ol dahi zikrolunan fırın ve değirmenin iktizâ eden cüz’î ve küllî ta‘mîrâtını kendi edip bizden nesne mutâlebe etmemek üzere ta‘ahhüd eyledi dedikde mezbûr Osman Ağa dahi mukırr-ı mezbûr Ahmed Beşe’yi cemî‘ kelimât-ı meşrûhasında vicâhen ve şifâhen tahkīk ve tasdîk etmeğin mâ-vaka‘a bi’t-taleb ketb olundu. Fî 26 Ca sene [1]184. Şuhûdu’l-hâl: Ekmekçiler Kethudâsı Ali Ağa, Yiğitbaşı Molla Osman, Kanlıfırın Ustası Ahmed [40a] Salıcı Molla Osman, Sofular Fırını Ustası Molla Mustafa, Üsküdarlı Molla Ali.