İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 147 Hüküm no: 102 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın Emine Hatun Vakfı’na ait arsa üzerine yaptığı yeni bina ile eski harap bina enkazının yerinde keşfolunduğu Husûs-ı âti’l-beyânın mahâllinde ketb ü tahrîri için bi’l-iltimâs cânib-i şerî‘at-i mutahharadan irsâl olunan keşif nâibimiz Ahmed Efendi hâssa mi‘mârlarından el-Hâc Mustafa ve Ahmed halîfeler ile mahmiye-i İstanbul’da Kocamustafapaşa kurbünde Duhânî mahallesinde vâki‘ arsası Emine Hatun Vakfı’ndan olup işbu bâ‘isü’l-kitâb Ali Ağa b. Osman’ın müceddeden binâ eylediği menzile varıp vakf-ı mezbûrun mütevellîsi Mustafa Ağa hazır olduğu hâlde derûnunda akd-i meclis-i şer‘-i âlî etdikde mezbûr Ali Ağa meclis-i ma‘kūd-ı mezkûrda takrîr-i kelâm ve ta‘bîr ani’l-merâm edip işbu mu‘âyene olunan menzilin fi’l-asl ebniye ve civârları bi’l-külliye harâb ve kābil-i süknâ olmayıp binâya eşedd-i ihtiyâc ile muhtâc ve vâkıf-ı merkūmun menzil-i mezbûru binâya mevkūf mâlı dahi olmamağla yedime verilen işbu bir kıt‘a i‘lâm nâtık olduğu üzere kıbel-i şer‘den me’zûn olup arsası sulehâya meşrûta olan menzil-i mezbûr arsası üzerine kendi mâlım ile mülküm olmak üzere nefsim için mütevellî ma‘rifetiyle mücedded bir bâb menzil binâ ve tekmîl edip lâkin menzil-i evvel-i mezkûrun enkāzı ile müceddeden binâ eylediğim ebniye-i mezkûreye eylediğim masrûfâtım ve harâb menzil-i mezkûrun enkāzı keşf ve tahmîn ve takvîm ve yedime kıbel-i şer‘den vesîka i‘tâ olunmak matlûbumdur dedikde gıbbe’t-tasdîkı’ş-şer‘î fi’l-hakīka mi‘mârân-ı mezbûrân ma‘rifetleriyle menzil-i mezkûrun enkāz-ı atîkası ve müceddeden binâ eylediği menzilin ebniyesi bi’t-taharrî keşf ü mesâha ve tahmîn ü takvîm eylediklerinde merkūm Ali Ağa’nın binâ eylediği enkāz-ı atîkanın kıymeti elli guruş olduğunu ba‘de’t-takvîm menzil-i mezkûrun ulyâsında iki bâb oda ve iki sofa ve dîvânhâne ve bir kenîf ve âbdesthâne ve vüstâda iki bâb oda ve bir sofa ve bir mikdâr dehliz ve süflâda bir kiler ve kenîf ve bir ahır ve bir kömürlük ve bir mağsel ebniyesi terbî‘an iki yüz on zirâ‘ olup ve beher zirâ‘ı altışar guruşdan cem‘an bin iki yüz altmış guruşa bâliğ olup ve ebniyeden hâric terbî‘an yirmi sekiz zirâ‘ bir matbah ve altmış zirâ‘ bir taş duvar ve mesârif-i sâiresi dahi bin guruş ki min-haysü’l-mecmû‘ bin üç yüz altmış guruşa bâliğ ve ebniye-i mezkûre meblağ-ı merkūm ile ancak vücûda gelir noksan ile kābil değildir deyü mi‘mârân-ı mezbûrân ile ebniye ve sukūf ahvâline ıttılâ‘ı olan bî-garaz Müslimîn bi’l-ittifâk haber verdiklerini mevlânâ-yı mezbûr mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ etmeğin mâ-vaka‘a bi’t-taleb ketb olundu. Fi’l-yevmi’l-hâmis min-Cumâdelûlâ li-sene erba‘a ve semânîn ve mie ve elf. Şuhûdu’l-hâl: Muhzır Molla İsmail b. Ali, Ali Çelebi b. Abdullah el-muhzır, Başçukadâr Mustafa Ağa b. Hasan, Muhzır Tiryâki Hasan Çelebi b. ( ), İmâm-ı mahalle Mehmed Efendi b. ( ), Hâfız Ahmed Efendi b. el-Hâc Abdülkadir, Süleyman Beşe b. el-Hâc İbrahim, Mehmed Emin b. el-Hâc Hüseyin, Nakkāş İbrahim Ağa b. Ali, diğer Mi‘mâr Halîfesi Ahmed Ağa b. Abdullah, Mi‘mâr Halîfe el-Hâc Mustafa b. Osman.