İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 148 Hüküm no: 103 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tanaş v. Panayot’un Hacı Ali Dükkânı olarak bilinen bakkal dükkânındaki gedik hissesi ile sermaye olarak konulan mallarını sattığı Bakkāl Mahmiye-i İstanbul’da Kocamustafapaşa Çarşısı’nda vâki‘ zikri âtî bakkāl dükkânında mütemekkin Tanaş v. Panayot nâm zimmî meclis-i şer‘-i şerîf-i enverde sulbî kebîr oğlu işbu bâ‘isü’r-rakīm Yorgo nâm zimmî tarafından husûs-ı âti’l-beyânı tasdîka vekîl olduğu nehc-i şer‘î üzere sâbit olan Yani v. Yorgi nâm zimmî muvâcehesinde ikrâr-ı tâm ve takrîr-i kelâm edip sâlifü’z-zikr Kocamustafapaşa Çarşısı’nda Kolluk ittisâlinde vâki‘ Hacı Ali Dükkânı demekle ma‘rûf bakkāl dükkânı derûnunda mevcûde beyne’l-hiref gedik ta‘bîr olunur ber-mûceb-i defter-i müfredât âlât-ı lâzımenin yüz yirmi sehim i‘tibârıyla kırk sehmi benim yedimde mülk ve hakkım olmağla ben âlât-ı mezkûreden i‘tibâr-ı mezkûr ile mâlik olduğum kırk sehim hisse-i şâyi‘amı altı bin akçeye ve yine dükkân-ı mezkûrda sermâye nâmıyla mevzû‘ bakkāl emti‘asını dahi otuz bin akçeye tarafeynden îcâb ve kabûlü hâvî şurût-ı müfsideden ârî bey‘-ı bâtt-ı kat‘î ve safka-i vâhide ile oğlum müvekkil-i mezbûr Yorgo zimmîye bey‘ ve temlîk eylediğimde işbu vekîl-i mezbûr Yani zimmî dahi ber-vech-i muharrer bi’l-vekâle iştirâ ve temlîk eyledikden sonra semeneyn-i mezkûreyn cem‘an otuz altı bin akçeyi oğlum müvekkilim mezbûr Yorgi zimmî yedinden bi’t-tamam ve’l-kemâl ahz u kabz edip bey‘-ı mezkûrun gabn ve tağrîrine ve istifâ-i semene ve bi’l-cümle gedik husûsuna müte‘allika [40b] âmme-i da‘vâdan oğlum müvekkilim mersûm Yorgo zimmînin zimmetini ibrâ-i âm ile ibrâ ve ıskāt eyledim ba‘de’l-yevm sâlifü’z-zikr bakkāl dükkânında gedik ta‘bîr olunan âlât-ı lâzımenin i‘tibâr-ı mezkûruyla kırk sehmi ve derûn-ı dükkânda sermaye nâmıyla mevzû‘ otuz bin akçelik bakkāl emti‘ası oğlum müvekkilim mezbûr Yorgo zimmînin mülk-i müşterâsı ve hakk-ı sırfı olup kat‘a benim alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 Cumâdelûlâ sene 1184. Şuhûdu’l-hâl: Manav İsmail Beşe, Attar Ahmed Efendi, Kasab Halil Beşe, Yani v. Nikola, Yorgi v. Nikola, Nikola v. Panayot.