İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 149 Hüküm no: 104 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine ve Hadîce hatunların, arsası vakıf olan mülk menzillerini sattıkları Mahmiye-i İstanbul’da Deniz Abdal mahallesinde sâkin iken bundan akdem fevt olan Mustafa Çavuş b. Satılmış nâm kimesnenin verâseti sulbî kebîr oğlu Derviş Mehmed’e münhasıra olup ba‘dehû mezbûr Derviş Mehmed dahi fevt olup verâseti zevce-i metrûkesi Emine bt. Mustafa ile sulbiye kebîre kızı Hadice’ye inhisârı tahakkukundan sonra zâtları ta‘rîf-i şer‘î ile mu‘arrefetân olan mezbûretân Emine ve Hadîce meclis-i şer‘-i şerîf-i enverde işbu bâ‘isü’l-kitâb Mehmed Çavuş Ağa b. Hasan nâm kimesne mahzarında ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan mezbûre Emine Hatun’un âhar menzili ve bir tarafdan diğer Hadîce Hatun menzili ve iki tarafdan tarîk-i âm ile mahdûd fevkānî ve tahtânî dört bâb oda ve dehliz ve taş musluk ve ahırı müştemil menzilin arsası mahalle-i mezbûre müezzinlerine meşrûta senede yüz yirmi akçe mukāta‘a-i kadîme ile üzerinde olan ebniyesi akd-i âti’z-zikrin sudûruna değin ırsen yedimizde mülkümüz olmağla biz ebniye-i menzil-i mezkûru tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile mezbûr Mehmed Çavuş Ağa’ya iki yüz yetmiş beş guruşa bey‘ ve temlîk ve teslîm ve arsasını dahi mütevellîsi hazır bi’l-meclis Müezzin Molla Mehmed ma‘rifetiyle meccânen ferâğ ve tefvîz eylediğimizde ol dahi ber-vech-i muharrer iştirâ ve temellük ve tesellüm ve tefevvüz ve kabûl eyledikden sonra semeni olan meblağ-ı mezkûr iki yüz yetmiş beş guruşu mezbûr Mehmed Çavuş Ağa yedinden bi-kadri’l-hısas tamamen ahz u kabz eyledik fîmâ-ba‘d ebniye-i menzil-i mahdûd-ı mezkûr cemî‘ müştemilâtıyla mezbûr Mehmed Çavuş Ağa’nın mülk-i müşterâsı ve arsası dahi dâhil-i havza-i tasarrufu olup kat‘a bizim alâka ve medhalimiz kalmamışdır dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 Ca sene [1]184. Şuhûdu’l-hâl: Salih Ağa b. Mehmed, İbrahim Efendi, Ahmed Efendi, Mustafa Çelebi. [41a] Temme bi-avnillâh ve hüsni tevfîkihî ve’l-hamdü li’llâhi fi’l-mebde’i ve’l-hitâm ve’s-salâtü ve’s-selâm alâ seyyidinâ Muhammed seyyidi’l-enâm ve âlihî ve sahbihi’l-kirâm Bende-i Hazret-i Hallâk İshak