İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 150 Hüküm no: 105 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ahmed ve kız kardeşine babalarından intikal eden vakıf menzilin yarım tasarruf hakkının başkasına devri için vasîlerine izin verildiği A‘lemü’l-ulemâ’i’l-muhakkıkīn efdalü’l-fudalâi’l-müdekkıkīn yenbû‘u’l-fazli ve’l-yakīn sa‘âdetlü semâhatlü Yahya Efendi hazretlerinin zaman-ı hükûmetlerinde olan vekāyi‘in hüccet sicillidir El-emru hasbemâ yahvîhî Harrerehü’l-fakīru ileyh azze şânuhû es-Seyyid Ömer el-müvellâ-hilâfeten bi-Dârü’s-saltanati’l aliyyeti’s-seniyyeti’l-hâkānîyye Mahmiye-i İslambol’da Cerrâhpaşa kurbünde Gürcü Paşa mahallesinde sâkin iken bundan akdem fevt olan Ahmed Beşe b. Hasan b. Abdullah’ın sulbî sagīr oğlu Mehmed ve sulbiye sagīre kızı Ümmügülsüm’ün vâlideleri ve vasîyy-i mansûbeleri ve zâtı ta‘rîf-i şer‘î ile mu‘arrefe olan bâ‘isetü’l-kitâb Âişe bt. Yusuf nâm hatun meclis-i şer‘-i şerîf-i enverde takrîr-i kelâm ve ta‘bîr ani’l-merâm edip mahalle-i mezbûrede vâki‘ bir tarafdan İbrahim menzili ve bir tarafdan el-Hâc Ali menzili ve bir tarafdan Mehmed Salih menzili ve bir tarafdan tarîk-i âm ile mahdûd mahalle-i mezbûrede müezzin olanlara meşrûta bir bâb menzilin nısfı gāibân ani’l-meclis Ali ve Hafize’nin ve nısf-ı âharı müteveffâ-yı mezbûrun ilâ vefâtihî bi’l-icâreteyn taht-ı tasarrufunda ve ba‘de vefâtihî vasîsi olduğum sagīrân-ı mezbûrâna intikāl edip lâkin nısf menzil-i mahdûd-ı mezkûr mürûr-ı eyyâm ile müşrif-i harâb ve bekāsı sagīr hakkında muzır olduğundan mezbûrânın mâlı olmayıp nafaka ve kisveye eşedd-i ihtiyâcı olmağın menzil-i mahdûd-ı mezkûrun nısf hisseleri bedel-i misli ve re’y-i mütevellî ile âhara ferâğ ve bedeli istirbâh olunmak haklarında her vechile enfa‘ ve evlâ olmağın menzil-i mahdûd-ı mezkûrdan sagīrân-ı mezbûrânın nısf hisseleri âhara ferâğa kıbel-i şer‘den bana izin verilmek bi’l-vesâye matlûbumdur dedikde fi’l-hakīka hâl bâlâda tahrîr olunan minvâl üzere olduğu zeyl-i kitâb[da] tûbâ lehû ve hüsnü-meâb efendi hazretleri dahi menzil-i mahdûd-ı mezkûrdan sagīrân-ı mezbûrânın nısf hisselerini bedel-i misli ve re’y-i mütevellî ile âhara ferâğa mezbûre Âişe Hatun’a izin vermeğin mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Cumâdelûlâ li-sene erba‘a ve semânîn ve mie ve elf. Şuhûdu’l-hâl: Kahve[ci] Hüseyin Beşe, Lüleci Osman b. Mustafa, Kahveci İbrahim b. Mahmud, Attar es-Seyyid Mustafa b. es-Seyyid İbrahim, Duhânî Hüseyin b. Mustafa, Hamza Baba b. Ali, Ali Çelebi b. Abdullah, Osman Ağa b. Hamza.