İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 151 Hüküm no: 106 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Osman’ın muhâlaa yoluyla İbrahim Beşe‘den boşandığı Mahmiye-i İslambol’da Küçükmustafapaşa kurbünde Mollahüsrev mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Emine bt. Osman nâm hatun meclis-i şer‘-i şerîf-i enverde zevc-i dâhilî bâ‘isü’l-vesîka İbrahim Bâşe b. Ahmed nâm kimesne mahzarında bi-tav‘ihâ ikrâr-ı tâm ve takrîr-i kelâm edip merkūm İbrahim Beşe zevc-i dâhilim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh olan kırk beş guruş müeccelimin on guruşunu bana edâ ve teslîm bâkī otuz beş guruş mehr-i müeccelim ve nafaka-i ma‘lûmem üzerlerine ve meûnet-i süknâm dahi kendi üzerime olmak üzere zevcim merkūm İbrahim Beşe ile muhâla‘a-i sahîha-i şer‘iye ile hul‘ olduğumdan ol dahi ber-vech-i muharrer hul‘-ı mezkûru ba‘de’l-kabûl hukūk-ı zevciyete ve mezbûrun firâşından hamlim dahi zuhûr eder ise nafaka-i hamlime müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz ber-vech-i muharrer âharın ibrâsını kabûl eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb ü imlâ olundu. Fi’l-yevmi’s-sânî min-Cumâdelâhir li-sene erba‘a ve semânîn ve mie ve elf. Şuhûdu’l-hâl: İmâm İsmail Efendi, Muhzır Ali Çelebi b. Abdullah, Kömürcü Mehmed Beşe b. ( ), Kömürcü Mustafa b. Hasan, Kömürcü Ahmed Ağa b. Ahmed.