İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 152 Hüküm no: 107 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Camcı esnafının talebi üzerine Mehmed Çelebi’nin kethudâ tayin olunduğu Mahmiye-i İstanbul’da camcı tâifesinin yiğitbaşıları Ahmed b. Osman ve Camcıbaşı Bostânî Ahmed b. el-Hâc Süleyman ve müsinn ü ihtiyârlarından es-Seyyid Halil b. Ali ve es-Seyyid Salih b. Mehmed ve es-Seyyid İbrahim b. Mehmed ve Süleyman b. Ahmed ve İsa b. Ali ve el-Hâc İbrahim b. Hüseyin ve Ali b. Mehmed ve Mustafa b. el-Hâc Ahmed ve el-Hâc Mustafa b. Yunus ve Mehmed b. Hüseyin ve Mustafa b. Abdullah ve Ali b. Ahmed ve İbrahim b. İsmail ve Salih b. el-Hâc Ali ve Halil b. Abdullah ve Ali b. Mehmed ve sâirleri meclis-i şer‘-i hatîr-i lâzımü’t-tevkīrde yine tâife-i merkūmede işbu râfi‘u’l-kitâb Mehmed Çelebi b. Ali mahzarında herbiri takrîr-i kelâm ve ta‘bîr ani’l-merâm edip hâlâ kethudâmız olan işbu hazır bi’l-meclis diğer Mehmed b. Ahmed umûr [ve] mesâlihimizi rü’yetden aczi hasebiyle kethudâlıkdan hüsn-i rızâsıyla kasr-ı yed etmekle mezbûr Mehmed Çelebi tâife-i mezbûr üstâdlarının kudemâsından örf ve âdetimize vâkıf ve nizâm ve intizâmımızı mûcib olan umûr-ı ahvâlimize kemâ-yenbagī ârif olmağın mezbûr Mehmed Çelebi cümlemizin re’y ve ittifâklarıyla kıbel-i şer‘-i enverden üzerimize kethudâ nasb ü ta‘yîn olunmak matlûbumuzdur deyü tafsîl ve tebyîn etmeleriyle hâkim-i muvakkı‘-ı sadr-ı kitâb refa‘a kadrehû mevlâhü’l-vehhâb hazretleri dahi mezbûr Mehmed Çelebi’yi kıbel-i şer‘-i enverden tâife-i merkūmeye kethudâ nasb ü ta‘yîn buyurduklarında ol dahi kethudâlığı kabûl ve hidemât-ı lâzımesini ikāmete ta‘ahhüd etmeğin mâ-vaka‘a bi’t-taleb ketb olundu. Fî 3 min-Cumâdelâhire sene 1184. Şuhûdu’l-hâl: es-Seyyid Salih b. Mehmed, es-Seyyid İbrahim b. Mehmed, Süleyman b. Ahmed, Molla Mustafa b. Mehmed, Ali b. Ahmed.