İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 152 Hüküm no: 108 Orijinal metin no: [41b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Ömer ve Hasan b. Mehmed’in merhûm Mehmed b. Ömer’in vârisleri olduklarını şahitlerle ispat ettikleri Vilâyet-i Anadolu’da Kurukavak kazâsına tâbi‘ Kabaemrud (Kabaarmut) nâm karye ahâlîsinden olup bundan akdem Medîne-i Münevvere -nevvereha’llâhu te‘âlâ- kādısı olan umdetü’l-mevâli’l-kirâm fazîletlü sa‘âdetlü Hafîd Mehmed Efendi b. Mehmed hazretlerinin hizmetlerinde iken bundan akdem vefât eden Mehmed b. Ömer nâm kimesneden ber-vech-i âtî verâset iddi‘â eden li-ebeveyn kız karındaşı işbu râfi‘ayi’l-kitâb Fâtıma bt. el-mezbûr Ömer ve li-ebeveyn ammioğlu Hasan b. Mehmed nâm kimesne meclis-i şer‘-i şerîf-i enverde tereke-i müteveffâ-yı mezbûra vaz‘-ı yedi mütahakkık olan mûmâ-ileyh Hafîd Mehmed Efendi hazretleri taraf-ı bâhirü’ş-şereflerinden husûs-ı âti’z-zikre vekîl olduğu Ahmed b. Hüseyin ve es-Seyyid Feyzullah b. Mustafa nâm kimesneler şehâdetleriyle sâbit olan Hüseyin Efendi b. Mehmed nâm kimesne mahzarında üzerine herbiri da‘vâ ve takrîr-i kelâm edip mezbûre Fâtıma; ben müteveffâ-yı mezbûrun li-ebeveyn kız karındaşı olup babamız ismi Ömer ve dedemiz ismi Mustafa ve anamız ismi Sâkine bt. Abdullah ve maskat-ı re’simiz Kabaemrud karyesi olup ve mezbûr Hasan b. mezbûr Mehmed’in li-ebeveyn ammisi oğlu olup babam Mehmed müteveffâ-yı mezbûr Mehmed’in babası Ömer ile li-ebeveyn er karındaşlar olup babaları ismi Mustafa ve dedeleri ismi Abdullah ve maskat-ı re’sleri mârrü’z-zikr Kabaemrud karyesi olmağla binâenaleyh müteveffâ-yı mezbûr Mehmed’in verâseti hasran bize münhasıra olup terekesine bizden gayrı müstahıkk-ı âharı olmamağla müvekkil-i mûmâ-ileyh tereke-i müteveffâ-yı mezbûra vaz‘-ı yed etmekle suâl olunup verâset-i mahkiyemiz hasebiyle bize alıverilmek matlûbumuzdur dediklerinde gıbbe’s-suâl vekîl-i mezbûr cevâbında ber-minvâl-i muharrer müvekkil-i mûmâ-ileyh efendi hazretlerinin tereke-i müteveffâ-yı mezbûra vaz‘-ı yedini bi’l-vekâle ikrâr ber-minvâl-i muharrer müdde‘iyân-ı mezbûrânın verâsetlerini inkâr edicek müdde‘iyân-ı mezbûrândan ber-vech-i muharrer müdde‘âlarına mutâbıka beyyine taleb olundukda udûl-i ahrâr-ı ricâl-i Müslimînden ve karye-i merkūme ahâlîsinden olup hâlâ Dergâh-ı âlî yeniçerilerinin doksan dokuz cemâ‘atin odabaşısı Mustafa b. Mehmed ve Sultân Bâyezid’de sâkin Kahveci Hasan Beşe b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûre Fâtıma müteveffâ-yı mezbûr Mehmed’in li-ebeveyn kız karındaşı olup babaları ismi Ömer ve dedeleri ismi Mustafa ve anaları ismi Sâkine bt. Abdullah ve maskat-ı re’sleri mezkûr Kabaemrud karyesi olup ve mezbûr Hasan müteveffâ-yı mezbûr Mehmed’in li-ebeveyn ammi oğlu olup mezbûr Hasan’ın babası müteveffâ-yı mezbûr Mehmed’in babası Ömer ile li-ebeveyn er karındaşlar olup babaları ismi Mustafa ve dedeleri ismi Abdullah ve anaları ismi Havva bt. Abdullah ve maskat-ı re’sleri mezkûr Kabaemrud karyesi olup müteveffâ-yı mezbûrun mezbûrân Fâtıma ve Hasan’dan gayrı terekesine müstahıkk-ı âharı olduğu ma‘lûmumuz değildir biz bu husûsa [42a] bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm mâ-vaka‘a bi’t-taleb ketb olundu. Fî 6 min-Cumâdelâhire sene 1184. Şuhûdu’l-hâl: Muhzırlar Kethudâsı Mehmed Ağa b. Ali, Bölükbaşı Osman b. Hamza, Ali Çelebi b. Abdullah, İsmail b. Ali, el-Hâc Mustafa b. Hasan.