İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 154 Hüküm no: 109 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyhzâde Hatun’un vakfettiği menzilin İbrahim b. Şeyh Mehmed’e tahsis edildiği Ashâb-ı hayrâtdan merhûme Şeyhzâde bt. Yusuf nâm sahibetü’l-hayrât mahmiye-i İslambol’da Ayasofya-i kebîr mahallesinde vâki‘ iki tarafdan Mehmed Ağa tasarrufunda olan vakıf menzil ve bir tarafdan Kaya Sultân kerîmesi sarayı ve bir tarafdan tarîk-i âm ile mahdûd fevkānî iki bâb oda ve tahtânî iki bâb oda ve bir ahır ve bir kenîfi müştemil vakıf menzil süknâsı rûhu için beher yevm üçer İhlâs-ı şerîf ile birer Fâtiha-i şerîfe tilâvet etmek üzere süknâya ahvec olan bir recül-i sâliha şart ve ta‘yîn edip menzil-i mahdûd-ı mezkûra tevcîh-i hâkimü’ş-şer‘le vâkıfe-i mezbûrenin şartı mûcebince mutasarrıf olan eş-Şeyh Mehmed fevt olup menzil-i mezkûr mahlûl olmağla sulbî kebîr oğlu olan İbrahim zümre-i sâlihînden olup süknâya ahvec olduğunu sikāt-ı sahîhatü’l-kelimât-ı Müslimîn haber vermeleriyle hâkim-i muvakkı‘-ı a‘la’l-kitâb -rafa‘a kadrehû mevlâhü’l-vehhâb- hazretleri dahi şurût-ı vâkıfe üzere menzil-i mahdûd-ı mezkûru kıbel-i şer‘den mezbûr İbrahim’e tevcîh ve ta‘yîn etmeğin tasarrufu için işbu sahîfe-i sahîha ba‘de’l-ketb ve’l-imlâ mezbûr İbrahim yedine def‘ ve i‘tâ olundu. Fî 12 min-Cumâdelâhire sene 1184. Şuhûdu’l-hâl: Mehmed Ağa b. Abdullah, Osman Çelebi b. Halil, Ahmed Ağa b. Abdullah.