İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 154 Hüküm no: 110 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalaycı esnafının talebi üzerine Alemdâr İbrahim’in kethudâ tayin olunduğu Mahmiye-i İstanbul’da kalaycı esnâfının müsinn ü ihtiyârlarından el-Hâc Ali b. Osman ve Ömer b. Ali ve Ahmed b. Abdullah ve İsmail b. Mehmed ve Ali b. Bilal ve Ahmed b. Ali ve Mehmed b. Ali [ve] Veli b. Veli ve Osman b. Ahmed ve Mustafa b. Mehmed ve Ömer b. Hüseyin ve Ebûbekir b. Ömer ve Ali b. Ahmed ve İsmail b. Musa ve İbrahim b. Şa‘ban ve Mehmed b. Ebûbekir ve Hasan b. Ali ve Hüseyin b. Mustafa ve Osman b. İbrahim ve Osman b. Salih ve Habib b. Ali ve Mustafa b. İbrahim ve el-Hâc Halil b. Ahmed ve İsa b. Mustafa ve İsmail b. Ahmed ve Mustafa b. Ahmed ve Hasan b. Halil ve Hasan b. Hüseyin ve sâirleri meclis-i şer‘-i hatîr-i lâzımü’t-tevkīrde yine esnâf-ı merkūmdan işbu râfi‘u’l-kitâb Alemdâr İbrahim b. Musa mahzarında herbiri takrîr-i kelâm ve ta‘bîr ani’l-merâm edip hâlâ kethudâmız olan el-Hâc Hasan b. Hüseyin umûr ve mesâlihimizi rü’yetden aczi hasebiyle kethudâlıkdan hüsn-i rızâsıyla kasr-ı yed etmekle mezbûr Alemdâr İbrahim esnâf-ı merkūme üstâdlarının kudemâsından örf ve âdetimize vâkıf ve nizâm ve intizâmımızı mûcib olan umûr ve ahvâlimize kemâ-yenbagī ârif olmağın hâlâ mezbûr Alemdâr İbrahim cümlemizin re’y ve ittifâklarıyla kıbel-i şer‘-i enverden esnâf-ı merkūmeye kethudâ nasb ü ta‘yîn olunmak matlûbumuzdur deyü tafsîl ve tebyîn etmeleriyle hâkim-i muvakkı‘-ı sadr-ı kitâb -rafa‘a kadrehû mevlâhü’l-vehhâb- hazretleri dahi mezbûr Alemdâr İbrahim’i kıbel-i şer‘-i enverden esnâf-ı merkūmeye kethudâ nasb ü ta‘yîn buyurduklarında ol dahi kethudâlığı kabûl ve hidemât-ı lâzımesine ikāmete ta‘ahhüd etmeğin mâ-vaka‘a bi’t-taleb ketb olundu. Fî 15 Cumâdelâhire sene 1184. Şuhûdu’l-hâl: Muhzırlar Kethudâsı Mehmed Ağa b. Ahmed, Osman Çelebi b. Halil, Hasan b. Mehmed, Ahmed b. Receb, Mustafa b. Halil.