İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 155 Hüküm no: 111 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vezir Mehmed Paşa’nın Midilli’deki iki bahçesini eşi olan III. Ahmed’in kızı Zeyneb Sultan’a sattığı Bi’s-sa‘âdeti ve’l-ikbâli’t-tâm hâlâ rikâb-ı hümâyûn kāimmakāmı olan vezîr-i âsaf-basîr ve müşîr-i müşteri-tedbîr devletlü inâyetlü Mehmed Paşa b. el-vezîrü’l-merhûm Süleyman Paşa -yesserallâhu mâ yürîd ve mâ yeşâ- hazretleri imtisâlen li’l-emri’l-âlî savb-ı şer‘-i enverden irsâl olunan vekāyi‘ kâtibimiz Mevlânâ Mehmed Necib Efendi saray-ı âlî-i devlet-pîrâlarında akdeylediği meclis-i şer‘-i şerîf-i enverde halîle-i muhteremeleri tâcü’l-mestûrât iklîletü’l-muhadderât aliyyetü’z-zât safiyyetü’s-sıfât Sıddîka-haslet Zehra-sîret râfi‘atü râyâti’s-sa‘âde ve’l-isme muvazzahatü âyâti’d-devleti ve’l-iffe sahibetü hâzihi’l-vesîkati’l-enîka devletlü ismetlü Zeyneb Sultân bt. el-merhûmü’l-mebrûru’l-müstağrık fî-rahmeti rabbihi’l-gafûr cennet-mekân Sultân Ahmed Han hazretleri taraf-ı aliyyelerinden şirâ’-i âti’z-zikri tasdîk ve kabûle vekîl-i müseccel-i şer‘îsi helvâcılar kethudâsı hizmetleriyle şeref-yâb olan fahrü’l-akrân es-Seyyid Hasan Ağa b. Hüseyin mahzarında ikrâr-ı tâm ve takrîr-i kelâm edip buyurup işbu bir kıt‘a hüccet-i şer‘iye mantûkunca akd-i âti’z-zikrin sudûruna değin silk-i mülk-i sahîhimde münselik olup medîne-i Midilli muzâfâtından Sarıca nâm karye hudûdu dâhilinde Lankada demekle arîf mahâlde vâki‘ bir tarafı Yorgaki Gaknozi mülkü ve bir tarafı Nikola Petro zimmî ve bir tarafı Yorgaki-i âhar Parlo zimmî mülkü ve taraf-ı râbi‘i cebel ile mahdûd ve mümtâz bir kıt‘a mülk zeytun hadîkamı bi-cümleti’t-tevâbi‘ ve’l-levâhık eşcâr-ı müsmire ve gayr-ı müsmiresiyle tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile Sultân-ı müşârün-ileyhâ -esbagallâhu ni‘amehû aleyhâ- hazretlerine bin altı yüz guruşa bey‘ ve temlîk ve yine işbu bir kıt‘a hüccet mantûkunca silk-i mülk-i sahîhimde münselik olup mârrü’z-zikr medîne-i Midilli kazâsına tâbi‘ Kelemiye karyesi hudûdu dâhilinde kâin bir tarafı [42b] Aci Kodi zimmî mülkü ve bir tarafı Abdülbaki Efendi Câmi‘-i şerîfi Vakfı ve tarafeyni Mîralayzâde Hasan Ağa mülkü ile mahdûd ve mümtâz derûnunda dört yüz kırk aded eşcâr-ı zeytun ve sâir eşcâr-ı müsmire ve gayr-ı müsmireli bir kıt‘a hadîkamı bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile Sultân-ı müşârün-ileyhâ hazretlerine bin beş yüz guruşa bey‘ ve temlîk ve herbirini mahallerinde zabta taslît eylediğimde Sultân-ı müşârün-ileyhâ hazretleri dahi ber-vech-i muharrer iştirâ ve temellük ve kabûl buyurup semenleri olan meblağeyn-i mezkûreyn bin altı yüz guruşu ve bin beş yüz guruş yedlerinden bi’t-tamam ve’l-kemâl ahz u kabz eyledim ba‘de’l-yevm sâlifü’l-beyân iki kıt‘a hadîka-i mahdûde-i mezkûre Sultân-ı müşârün-ileyhâ hazretlerinin mülk-i müşterâları ve hakk-ı sırfları olup benim kat‘a alâka ve medhalim kalmamışdır keyfe mâ teşâ ve hasbemâ tahtâr tasarrufe buyursunlar dedikde gıbbe’t-tasdîkı’ş-şer‘î vâki‘ hâli mevlânâ-yı merkūm mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Cemâziyelâhir li-sene erba‘a ve semânîn ve mie ve elf. Şuhûdu’l-hâl: Ketenci Ali Ağa b. Osman, el-Hâc Ebûbekir tâbi‘-i müşârün-ileyhâ, Kaftanî Halil Ağa b. Abdurrahman, Mehmed Efendi b. Abdullah kâtib-i Sultân-ı müşârün-ileyhâ, Ârif Mehmed Efendi b. Abdullah masraf-ı kâtib-i Sultân-ı müşârün-ileyhâ.