İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 156 Hüküm no: 112 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul ve civarındaki çamaşırcı esnafının talebi üzerine azli istenen Osman Usta’nın kethudâlıkta bırakılması Âsitâne-i aliyye ve tevâbi‘inde vâki‘ câmeşûycu esnâfından olup derûn-ı hüccetde isimleri mezkûr Du‘âcı el-Hâc Ali ve Halil Usta ve İsmail Usta ve es-Seyyid Hasan Usta ve el-Hâc Osman Usta ve el-Hâc Mustafa Usta ve Yusuf Usta ve Mustafa Usta ve diğer Yusuf Usta ve el-Hâc İbrahim Usta ve âhar İbrahim Usta ve es-Seyyid Mustafa Usta ve Yiğitbaşı es-Seyyid Mustafa Usta ve Mehmed Usta ve Ali Usta ve sâirleri meclis-i şer‘-i şerîf-i enverde hâlâ kethudâları işbu râfi‘u’l-kitâb Osman Usta b. Ali mahzarında herbiri ikrâr ve takrîr-i kelâm edip mezbûr Osman Usta bundan akdem cümlemizin talebiyle kıbel-i şer‘den üzerimize kethudâ nasb olunmuşidi lâkin umûrumuzu rü’yetde tekâsül eder deyü teşekkî ve kethudâlıkdan azlini iltimâs etmişidik hâlâ mezbûr Osman Usta umûrumuzu kemâ-kân rü’yete ihtimâm ve sa‘y etmeğe ta‘ahhüd etdikde biz dahi teşekkîmizden fâriğler olup mezbûr Osman Usta kethudâlıkda ibkā olunmak murâdımız[dır] dediklerinde hâkim-i muvakkı‘-ı sadr-ı kitâb tûbâ lehû ve hüsnü-meâb efendi hazretleri mezbûr Osman Usta’yı kethudâlıkda ibkā ve fîmâ-ba‘d umûr-ı nizâmlarını alâ-vechi’l-istikāme rü’yet etmek üzere tenbîh birle mâ-vaka‘a bi’t-taleb ketb olundu. Fî 2 min-Receb sene 1184. Şuhûdu’l-hâl: Kethudâ-yı Muhzırân Molla Mehmed, Ali Çelebi b. Abdullah, Araboğlu Muhzır Mehmed, Molla İsmail b. Ali, Baltacı el-Hâc Mustafa.