İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 157 Hüküm no: 113 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın Şeyh Muhyiddin Kocevî Mescidi Vakfı’na mütevellî tayin olunduğu Mahmiye-i İslambol’da Üskübî mahallesi kurbünde Şeyh Muhyiddin Kocevî Mescid-i şerîfi Evkāfı’ndan yevmî iki akçe vazîfe ile ve yine zikrolunan Şeyh Muhyiddin Kocevî mahallesi ahâlîsinin hâne-i avârızları evkāfına yevmî üç akçe vazîfe ile bâ-hüccet-i şer‘iye tevcîh-i hâkim ile mütevellî olan el-Hâc Süleyman fevt olup tevliyeteyn-i merkūmeteyn mahlûl ve yeri hâlî kalmağla mahalle-i mezbûre ahâlîsinden işbu râfi‘u’l-kitâb Mehmed Ağa b. el-Hâc Süleyman Efendi müstakīm ve her vechile tevliyet uhdesinden gelmeğe kādir ve muhtârları olduğu zeyl-i vesîkada muharrerü’l-esâmî ahâlî-i mezbûre haber vermeleriyle muvakkı‘-ı sadr-ı kitâb -rafa‘a kadrehû mevlâhü’l-vehhâb- efendi hazretleri tevliyeteyn-i mezbûreteyn vazîfe-i mersûmeleriyle kıbel-i şer‘den mezbûr Mehmed Ağa’ya tevcîh buyurduklarında ol dahi kabûl ve hidemât-ı lâzımesini edâya ta‘ahhüd ve iltizâm etmeğin işbu sahîfe-i sahîha bi’l-ibtigā ketb ve tenmîk olunup yedine i‘tâ olundu. Fî 7 min-Receb sene 1184. Şuhûdu’l-hâl: el-Hâc Mustafa b. İbrahim, Hâfız İsmail b. Mustafa, el-Hâc Mustafa b. Mehmed, el-Hâc Ahmed b. Mehmed, el-Hâc Ömer b. Süleyman, Mehmed b. Ahmed ve gayruhum.