İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 157 Hüküm no: 114 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki nalçacı esnafının talebi üzerine Abdullah Usta’nın kethudâ tayin olunduğu Âsitâne-i aliyye’de vâki‘ na‘lçacı esnâfının kethudâları Mustafa Usta b. Ali nâm kimesne meclis-i şer‘-i şerîf-i enverde esnâf-ı mezkûre ustalarından ehl-i hibre Ahmed Usta ve Osman Usta ve Mehmed Usta ve Ali Usta ve İsmail Usta ve diğer Ali Usta ve Mustafa Usta ve Salih Usta ve Hüseyin Usta ve diğer Mehmed Usta ve es-Seyyid Musa Usta ve diğer Mustafa Usta ve Hasan Usta ve diğer Hüseyin Usta ve Feyzullah Usta ve Mütevellî es-Seyyid Mehmed Usta ve Ahmed Usta ve es-Seyyid Mustafa Usta ve Mehmed Emin Usta ve Abdullah Usta ve es-Seyyid Ahmed Usta ve Halil Usta ve es-Seyyid Osman Usta ve âhar Ali Usta hazır oldukları hâlde kethudâlık umûrunu idâreden izhâr-ı [43a] acz ve keff-i yed etmekle içlerinden biri kethudâ nasb olunmasını iltimâs ve işbu bâ‘isü’l-kitâb Mahmudpaşa’da Abdullah Usta b. Hasan nâm kimesneyi bi’l-cümle esnâf ustaları hâzırûn-ı merkūmûn ihtiyâr ve idâreye kādir olduğunu ihbâr etmeleriyle a‘lâ-yı kitâbı tevkī‘-i müstetâbı ile tezyîn buyuran hâkim-i hâsim efendi hazretleri mezbûr Abdullah Usta’yı esnâf-ı mezkûre üzerine talebleriyle kethudâ nasb ü ta‘yîn ve umûr-ı mu‘tâdelerini vechi’l-istikāme rü’yet etmek üzere tenbîh buyurduklarında ol dahi kabûl ve hilâf-ı şer‘-i şerîf hareket etmeyip kadîmî üzere umûrlarını rü’yet ve idâreye müte‘ahhid olmağın mâ-hüve’l-vâki‘ bi’t-taleb ketb olundu. Fî 8 min-Recebi’l-ferd sene 1184. Şuhûdu’l-hâl: Osman Bölükbaşı, Baltacı el-Hâc Mustafa, Ali Çelebi b. Abdullah, İsmail Çelebi b. Ali, Kethudâ-yı Muhzırân Mehmed Ağa ve gayruhum.