İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 158 Hüküm no: 115 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki hurdacı esnafının talebi üzerine Hacı Süleyman’ın kethudâ tayin olunduğu Âsitâne-i aliyye’de esvâk-ı bâzârda yayımcı ta‘bîr olunur hurde-fürûş esnâfından Hüseyin b. Halil ve Ali b. Musa ve Mustafa b. Ömer ve Halil b. Mehmed ve Ahmed b. Mustafa ve el-Hâc İbrahim b. el-Hâc Mahmud ve Süleyman b. Abdullah ve Ahmed b. Mustafa nâm kimesneler ile Bogos v. Kokas ve Ariton v. Kokas ve Bogos v. Bedros ve Artin v. Diyor ve Aleks v. Kirkor ve Stefan v. Serkiz ve Ağyaz v. Abraham nâm zimmîler meclis-i şer‘-i şerîf-i enverde işbu râfi‘u’l-kitâb el-Hâc Süleyman b. Derviş Mustafa muvâcehesinde herbiri takrîr-i kelâm ve ta‘bîr ani’l-merâm edip beynimizde vukū‘ bulan nizâmımızı temşiyet için bâ-hüccet-i şer‘iye kethudâmız olan Mustafa b. Osman kethudâlığı terk ve diyâr-ı âhara gidip yeri hâlî kalmağla bir kethudâ lâ-büd olmağın mezbûr el-Hâc Süleyman mu‘temed ve müstakīm ve umûr-ı esnâfı idâreye kādir cümlenin muhtârı olduğunu haber vermeleriyle mezbûr el-Hâc Süleyman esnâf-ı mezbûr üzerlerine kethudâ nasb ü ta‘yîn oldukda ol dahi kabûl ve umûr-ı esnâfı nizâm-ı kadîmleri üzere idâreye ta‘ahhüd etmeğin mâ-vaka‘a bi’t-taleb ketb olundu. Fî 25 min-Receb sene 1184. Şuhûdu’l-hâl: Süleyman b. Abdullah, Halil b. Mehmed, Ahmed b. Mustafa.