İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 163 Hüküm no: 121 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhûm İbrahim Ağa’nın vesayeten zapt olunan terekesinin vârislerine teslim olunduğu Fi’l-asl vilâyet-i Anadolu’da Bendereğli kazâsına tâbi‘ Çatalçam karyesi ahâlîsinden olup mahmiye-i İstanbul’da Sarıgörez kurbünde Çıkrıkçı Kemâl mahallesinde vâki‘ Molla Hüseyin nâm kimesne menzilinde müsâfiren sâkin iken bundan akdem vefât eden Dergâh-ı âlî yeniçerileri zümresinden İbrahim Ağa b. Ahmed’in verâseti sâlifü’z-zikr Çatalçam karyesinde sâkinler li-ebeveyn er karındaşları Hasan ve Ali ve Hüseyin nâm kimesneler ile li-ebeveyn kız karındaşı Fâtıma Hatun’a inhisârı tahakkukundan sonra mezbûr Hüseyin kendi tarafından asâleten ve karındaşları mezbûrûn taraflarından bir kıt‘a hüccet mantûkunca vekîl-i şer‘îleri olmağla asâleten ve vekâleten meclis-i şer‘-i şerîf-i enverde bâ‘isü’l-kitâb Molla Hüseyin b. Osman nâm kimesne muvâcehesinde ikrâr-ı tâm ve takrîr-i kelâm edip mezbûr Molla Hüseyin karındaşımız müteveffâ-yı mezbûrun terekesine bi’l-vesâye vâzı‘u’l-yed olmağla ber-mûceb-i defter-i kassâm makbûzu olup benim ve müvekkillerim mezbûrûnun ber-nehc-i şer‘î hissemize isâbet eden cem‘an yirmi üç bin iki yüz kırk akçe hakkımızı tamamen bana def‘ ve teslîm eylediğinde ben dahi bi’l-asâle ve bi’l-vekâle yedinden bi-kadri’l-hısas ahz u kabz eyleyip tereke-i müteveffâ-yı merkūmdan vasîyy-i mezbûr Molla Hüseyin yedinde ve zimmetinde bir akçe ve bir habbe bâkī kalmamağla karındaşımız müteveffâ-yı mezbûr İbrahim Ağa’nın dâhil-i defter ve hâric-i ez-defter-i kassâm kalîl ü kesîr, celîl ü hakīr ma‘lûm ve mechûl terekesine müte‘allika âmme-i de‘âvî ve kâffe-i mutâlebât ve eymân [ve] muhâsamâtdan vasîyy-i mezbûr Molla Hüseyin’in zimmetini bi’l-asâle ve bi’l-vekâle ibrâ ve ıskāt eylediğimde ol dahi ibrâ-i mezkûru kabûl eyledi dedikde merkūm Molla Hüseyin dahi tasdîk ve tahkīk ve ibrâsını kabûl etmeğin mâ-vaka‘a bi’t-taleb ketb olundu. Fi’l-yevmi’s-sâmin aşer min-Şa‘bâni’l-mu‘azzam li-sene erba‘a ve semânîn ve mie ve elf. Şuhûdu’l-hâl: İbrahim Ağa b. Halil, Zühdü İsmail Efendi b. Ali, Mustafa Efendi b. Ali, Alemdâr Hüseyin Ağa b. Halil ve karındaşı Hüseyin Beşe, Ali Beşe b. Osman, Kütahiyyeli Berber Hasan Ağa b. Abdullah, Ali Çelebi b. Abdullah, Osman Çelebi b. Hamza, Mustafa b. Ahmed.