İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 164 Hüküm no: 122 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âmidî Mehmed Efendi’nin oğlu Abdülfettah’ın babasından intikal eden vakıf menzilin oturma hakkını devrettiği Mahmiye-i İstanbul’da İbn Meddas nâm-ı diğer Salih Paşa mahallesinde sâkin iken bundan akdem vefât eden müderrisîn-i kirâmdan Âmedî es-Seyyid Mehmed Efendi nâm kimesnenin sulbî oğlu Abdülfettah nâm sagīrin anası ve vasiyye-i mansûbesi olan Zeliha bt. Ali nâm hatun meclis-i şer‘-i şerîf-i enverde müderrisîn-i kirâmdan işbu râfi‘u’l-kitâb İbrahim Efendi b. Mehmed mahzarında bi’l-vesâye ikrâr ve takrîr-i kelâm edip mahalle-i mezbûrede vâki‘ ber-mûceb-i vakfiye-i ma‘mûlün-bihâ lede’l-ahâlî ve’l-cîrân ma‘lûmü’l-hudûd ve’l-müştemilât bir bâb menzilin arsası Nasuh Ağa Vakfı’na senede iki yüz yirmi akçe mukāta‘a ile ebniyesi sahibetü’l-hayr merhûme Havva Hatun Vakfı’ndan olup külle yevm üçer İhlâs-ı şerîf ve bir Fâtiha-i şerîfe tilâvet edip sevâbını rûhuna ve sâir mü’minîn [ve] mü’minât ervâhına ve her sene bir hatm-i şerîf tilâvet edip sevâbını sultân-ı enbiyâ bürhân-ı enkıyâ ve rasûl-i kibriyâ -sallallâhu te‘âlâ aleyhi ve sellem- hazretlerinin ervâh-ı şerîflerine ihdâ etmek üzere süknâ ve tevliyeti ulemâ-yı âmilînden süknâya muhtâc bir recül-i sâliha şart etmekle şart-ı mezkûr üzere menzil-i mezkûra tevcîh-i hâkimle zevcim müteveffâ-yı mezbûr Âmidî es-Seyyid Mehmed Efendi mutasarrıf iken fevt oldukda menzil-i mezkûru sulbî oğlu Abdülfettah nâm sagīre terahhuman tevcîh olunmuşidi lâkin sagīr-i mezbûrun benden gayrı hâdınesi ve münfik-i şer‘îsi olmayıp ben dahi vatan-ı asliyem olan medîne-i Âmid’e azîmet ve sagīr-i mezbûru dahi bi’l-âhare ma‘an götürmek iktizâ edip menzil-i mezbûru terk murâd eylediğimde mezbûr İbrahim Efendi ulemâdan olup bir süknâya muhtâc olduğuna binâen mâlından teberru‘an sagīr-i mezbûr için bana iki yüz guruş verip meblağ-ı mezkûra müte‘allika âmme-i da‘vâdan benim ve sagīr-i mezbûrun zimmetimizi ibrâ ve ıskāt eyledikde ben dahi menzil-i mezkûrdan bi’l-vesâye kasr-ı yed eyledim menzil-i mezkûru kıbel-i şer‘den mezbûr İbrahim Efendi’ye tevcîh olunmak matlûbumdur dedikde hâl bi’l-cümle mezbûre[nin] takrîr-i meşrûhuna mutâbık olup mezbûr İbrahim Efendi ulemâ-i âmilînden ve her vechile süknâya muhtâc olduğu zeyl-i vesîkada muharrerü’l-esâmî Müslimîn haberleriyle zâhir ve mütehakkık olmağın bâlâ-yı kitâbı tevkī‘-i refi‘i ile tezyîn eden hâkim-i hâsim-i ma‘delet-nisâb tûbâ lehû ve hüsnü-meâb efendi hazretleri menzil-i mahdûd-ı mezkûrun süknâsını kıbel-i şer‘-i enverden ber-mûceb-i şart-ı vâkıfe mûmâ-ileyh İbrahim Efendi’ye tevcîh buyurup ve tasarrufu’çün işbu sahîfe-i sahîha li-ecli’t-tevsîk bi’l-ibtigā ketb olundu. Fi’l-yevmi’s-sâmin aşer min-Şa‘bâni’l-mu‘azzam li-sene erba‘a ve semânîn ve mie ve elf min-hicreti men lehu’l-izzü ve’ş-şeref. Şuhûdu’l-hâl: Muhzır Ali Çelebi b. Ali, Kethudâ-yı Muhzırân Mehmed Ağa, es-Seyyid İbrahim b. el-Hâc Ebûbekir, es-Seyyid İsmail Efendi b. Hüseyin, Mehmed Ârif Efendi b. Ali.