İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 165 Hüküm no: 123 Orijinal metin no: [44b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun Vakfı’na ait boş menzilin ulemâdan Abdülfettah Efendi’ye tevcih edildiği Mahmiye-i İstanbul’da İbn Meddas nâm-ı diğer Salih Paşa mahallesinde vâki‘ ber-mûceb-i vakfiye-i ma‘mûlün-bihâ ma‘lûmü’l-hudûd ve’l-cîrân bir bâb menzilin arsası merhûm Nasuh Ağa Vakfı’na senede iki yüz yirmi akçe mukāta‘a ile ebniyesi sahibetü’l-hayrât merhûme Havva Hatun Vakfı’ndan olup külle yevm üçer İhlâs-ı şerîf ve bir Fâtiha-i şerîfe tilâvet edip sevâbını rûhuna [45a] ve sâir mü’minîn ve mü’minât ervâhına ve her sene bir hatm-i şerîf tilâvet edip sevâbını sultân-ı enbiyâ bürhân-ı enkıyâ rasûl-i kibriyâ -sallallâhu te‘âlâ aleyhi ve sellem- hazretlerinin rûh-ı şerîflerine ihdâ etmek şartıyla süknâ ve tevliyeti ulemâ-i âmilînden süknâya muhtâc bir recül-i sâliha meşrûta olup ol vechile menzil-i mezkûra mutasarrıf olan müderrisîn-i kirâmdan Âmidî es-Seyyid Mehmed Efendi fevt olup menzil-i mezbûr münhal olmağın ulemâ-i âmilîn ve sulehâdan ve her vechile süknâya muhtâc olduğu lede’ş-şer‘i’l-enver zâhir ve mütehakkık olan işbu râfi‘u’l-kitâb Abdülfettah Efendi’ye menzil-i mezkûru bâlâ-yı kitâbı tevkī‘-i refî‘i ile tezyîn eden hâkim-i hâsim-i ma‘delet-nisâb tûba lehû ve hüsnü-meâb efendi hazretleri şart-ı vâkıfe üzere tevcîh buyurup menzil-i mezkûrun tasarrufuna izin vermeğin mâ-vaka‘a bi’t-taleb ketb olundu. Fi’l-yevmi’r-râbi‘ min-Recebi’l-ferd li-sene erba‘a ve semânîn ve mie ve elf. Şuhûdu’l-hâl: Hüseyin Efendi b. Ahmed, Osman Efendi b. Abdullah, Ahmed Necib Efendi.