İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 165 Hüküm no: 124 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerağî Hamza Vakfı’na ait menzilin mütevellisi tarafından Müderris Mehmed Said Efendi’ye kiraya verildiği Mahmiye-i İslambol’da Dülgeroğlu mahallesinde sâkin müderrisîn-i kirâmdan Mehmed Said Efendi b. Abdullah Bey meclis-i şer‘-i şerîf-i enverde Çerâğī Hamza Vakfı mütevellîsi râfi‘u hâze’l-kitâb Ömer Efendi b. Ebûbekir nâm kimesne tarafından husûs-ı âti’z-zikrde vekîl olduğu müderrisîn-i kirâmdan Abdülvehhab Efendi b. Abdullah ve el-Hâc Ahmed b. el-Hâc Rasûl şehâdetleriyle sâbit olan İbrahim Efendi mahzarında ikrâr ve takrîr-i kelâm edip mârrü’z-zikr Çerâğī Hamza Vakfı müsakkafâtından olup mahmiye-i mezbûrede Beyceğiz mahallesinde vâki‘ bir tarafdan Simkeş Kara İsmail menzili ve bir tarafdan Veli Beşe menzili ve bir tarafdan Mehmed Emin Efendi menzili ve bir tarafdan tarîk-i âm ile mahdûd müştemilât-ı ma‘lûmeyi hâvî bir bâb menzil müderrisîn-i kirâmdan karındaşı Mustafa Efendi’nin bi’l-icâreteyn tasarrufunda iken bilâ-veled fevt olup taraf-ı vakf-ı merkūma âid ve râci‘ olmağla menzil-i mezkûr sûk-ı sultânîde ba‘de’l-müzâyede ve inkıtâ‘ı’r-rağbe el-yevm bedel-i misli olan dört yüz elli guruşda benim üzerimde karâr edip tâlib-i âharı zuhûr etmemekle vekîl-i mezbûr İbrahim dahi menzil-i mezkûru mârrü’z-zikr dört yüz elli guruş mu‘accele ve icâre-i müeccele-i kadîmesiyle taraf-ı vakıfdan bi’l-vekâle bana îcâr ve tefvîz ve ben dahi istîcâr ve kabûl ve mu‘accele-i merkūmeyi vekîl-i mezbûra tamamen def‘ u teslîm ol dahi vakf-ı mezbûr için ahz u kabz eylediğinden sonra medfû‘um olan mu‘accele-i merkūmenin istifâsına ve bi’l-cümle husûs-ı mezkûra müte‘allika âmme-i da‘vâdan taraf-ı vakf-ı mezbûru ve mütevellî-i mezbûr Ömer Efendi’nin vekîl-i mezbûrun zimmetlerini ibrâ ve ıskāt edip ol dahi ibrâyı kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 min-Şa‘bân sene 1184. Şuhûdu’l-hâl: Müderrisîn-i kirâmdan Abdülvehhab Efendi b. Abdullah, el-Hâc Ahmed b. el-Hâc Rasûl, Muhzırân Kethudâsı Mehmed Ağa b. Ahmed, el-Hâc Mustafa b.Hüseyin, Ali Çelebi b. Abdullah.