İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 166 Hüküm no: 125 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasapların kestiği hayvanlardan çıkan iç yağını, nizâmı üzere mumcu tâifesine verme taahhütünde bulundukları Âsitâne-i aliyye’de vâki‘ kasab tâifesinden el-Hâc Mehmed b. el-Hâc Halil ve el-Hâc Abdullah b. el-Hâc Mehmed ve el-Hâc Mehmed b. el-Hâc İbrahim ve sâirleri meclis-i şer‘-i hatîr-i lâzımü’t-tevkīrde Şehir Kasabbaşısı izzetlü Nu‘man Ağa ve Kasablar Kethudâsı İsmail Ağa hazır oldukları hâlde herbiri takrîr-i kelâm ve ta‘bîr ani’l-merâm edip Âsitâne-i aliyye’de gerek beylik ve gerek şehir için zebh olunan ağnamın iç yağlarını bâ-emr-i âlî mumcu tâifesine verilip onlar dahi mum yapıp ibâdullâha bey‘ edegelip bu vechile beynimizde nizâm cârî olup lâkin bu esnâda Yedikule hâricinde olan selhhâneler muhterik olup kasab tâifesi derûn-ı Âsitâne’ye müteferrika olduğundan mumcu esnâfı bizlerden hâsıl olan iç yağını ketm ve ihfâ edersiz deyü teşekkî ve beynimizde nizâ‘ vâki‘ olmağla telef ve zâyi‘ olmayıp taht-ı zâbıtaya idhâl için zebh olunan ağnamın herbir re’sinden yüz elli dirhem iç yağından noksan verilmeyip ziyâde hâsıl olursa ziyâdeyi dahi kemâ-fi’l-evvel ketm ve ihfâ olunmayıp mumcu tâifesine vermek üzere kavl ü ittifâk ve ahd [ü] mîsâk eyledik dediklerinde mûmâ-ileyh Kasabbaşı Nu‘man Ağa ve Kethudâ İsmail Ağa dahi [ber]-minvâl-i muharrer kefîller olmağın vâki‘ hâl hıfzan li’l-makāl bi’t-taleb ketb olundu. Fî-gurret-i Ramazani’l-mübârek sene 1184. Şuhûdu’l-hâl: Muhzırân Kethudâsı Mehmed Ağa b. Ahmed, İsmail Çelebi b. Abdullah, Ali Çelebi b. Abdullah.